Read Imbabura Highland Quichua Psalms 135 Bible Online

Psalms 135 - Imbabura Highland Quichua bible

Psalms 135

¹Mandaj Diosta alicachinguichi. Mandaj Diospaj shutita alicachinguichi. Mandaj Diosta servijcuna, paita alicachinguichi.

²Mandaj Diospaj huasipi tiajcuna, ñucanchi Taita Diospaj huasi patiocunapi tiajcuna, paita alicachinguichi.

³Mandaj Diosta alicachinguichi, paica aligupachami. Paipaj shutitaca, Salmocunahuan candaichi. Paica, ali shungutami charin.

⁴Mandaj Diosmi Jacobotaca, paipajlla cachun agllarca. Paimi israelcunataca, paipajlla cachun shicanyachirca.

⁵Mandaj Diosca jatunmi, chaitaca yachanimi. Ñucanchi Jatun Diosca, tucui dioscunatapash yalimi.

⁶Mandaj Diosca, jahua pachapipash, cai pachapipash, mama cuchapipash, manllanayai ucu ucu chai tucui yacucunapipash, pai imata rurangapaj munashcatami rurajun.

⁷Paimi, cai pacha tucurij manñacunamanda fuyutaca vichai apan. Tamiachumbash, paimi punchapambata shitamun. Paimi, huairatapash alichishca pushtucunamanda llujchimun.

⁸Paimi, Egiptopi causajcunapaj punda huacharishcataca, gentecunamanda callarishpa, animalcunacaman huañuchirca.

⁹Egiptopi causajcunalla, cangunapaj chaupipimi ima ricuchinacunata, jatun manllarinacunata rurashpa ricuchirca. Faraondapash, tucui paita servijcunandimi llaquichirca.

¹⁰Ashtaca llactacunatami tucuchirca. Ninan ushaita charij, jatun mandajcunatapashmi huañuchirca.

¹¹Amorreocunata jatun mandaj Sehón shuti runatapash, Basán llactata jatun mandaj Og shuti runatapashmi huañuchirca. Canaán llactata jatun mandajcunatapash, tucuillatami huañuchirca.

¹²Paicunapaj llactacunataca, pai agllashca israelcunapaj cachunmi, paicunaman curca.

¹³Mandaj Dioslla, cambaj shutica na tucurij causaita causaicamanmi. Mandaj Dioslla, canda yarinapash mirai miraicamanmi.

¹⁴Mandaj Diosmi, pai agllashcacuna imatalla rurashcataca ricunga. Paita servijcunataca llaquingami.

¹⁵Shuj llactapi causajcunapaj yanga dioscunaca culquita, orota rurashcallami. Runacunapaj maquihuanlla rurashcacunami.

¹⁶Shimita charishpapash, na rimanllu. Ñavita charishpapash, na ricunllu.

¹⁷Rinrita charishpapash, na uyanllu. Paicunapaj shimimandaca, samaipash na llujshinllu.

¹⁸Chaicunata tucui rurajcunapash, chaicunata tucui yarijcunapash, chaicunamanllata rijchajcunami.

¹⁹Israelcunalla, Mandaj Diostaca aligumi cangui nichiyari. Aaronbaj miraicunalla, Mandaj Diostaca aligumi cangui nichiyari.

²⁰Levipaj miraicunalla, Mandaj Diostaca aligumi cangui nichiyari. Mandaj Diosta manllashpa causajcunapash, Mandaj Diostaca aligumi cangui nichiyari.

²¹Jerusalenbi causajuj Mandaj Diosca, Sion shuti pueblomandapacha alicachi tucushca cachun. Mandaj Diostaca, aligumi cangui nichiyari.