Read Imbabura Highland Quichua Psalms 139 Bible Online

Psalms 139 - Imbabura Highland Quichua bible

Psalms 139

¹Candajcunata mandaj candachijuchun, David rurashca Salmomi. Mandaj Dioslla, ñuca imashna cajta ricushpami, tucuita rijsihuashcangui.

²Ñuca tiarijtapash, jatarijtapashmi ricuhuashcangui. Ñuca imatalla yarijujtacarin, carumandallatami yachashcangui.

³Ñuca maipi purijujpipash, samajujpipash aligutapachami ricuhuashcangui. Ñuca imashna causajujtapash, tucuitami rijsihuashcangui.

⁴Ricui Mandaj Dioslla, canga ñuca jalluhuan imatapash nara rimajpillatami, ñapash tucuita yachangui.

⁵Huashatapash, ñaupajtapashmi muyuhuarcangui. Cambaj maquitapash, ñuca jahuapimi churahuarcangui.

⁶Chashnapacha cambaj yachaica, ñucapaca ninanda manllarinami. Ninan jatumbacha cajpimi, na yachai ushapani.

⁷Cambaj Espiritumandaca, ¿maimanshi risha? Cambaj ñaupajmandaca, ¿maipita pacajugrisha?

⁸Jahua pachaman vichai rijpipash, canga chaipimi cangui. Ñuca samanata Seolpi churajpipash, canga chaipimi cangui.

⁹Tutamandata alascunahuan calpanshna rishpa, mama cucha tucuri manñapi causagrijpipash,

¹⁰chaipipashmi cambaj maquihuan pushahuangui. Cambaj ali lado maquihuanmi charihuangui.

¹¹“Yana yana tutaca pacahuangapachami” nijujpipash, chai tutapashmi ñuca muyundipica punchayachinga.

¹²Cambaj ñavimandaca, yana yana tutapash na pacai ushanllu. Tutapash punllashnallatami punchayachijun. Yana yanapash, punchapambapash, cambaj ñavipica chashnallatami.

¹³Canmi, ñuca vijsa ucupi tucui tiajcunataca rurarcangui. Ñuca mamapaj vijsapipash, canmi viñachishcangui.

¹⁴Ninanda manllarina, juyaillagucunata rurashcamandami, candaca alicachisha. Ñucaca, ninandapacha manllarishcami cani. Chaitaca, ñuca almapash alipachami yachan.

¹⁵Ari, pacallapi ñuca viñajushpapash, cambaj ñaupajpica na pacalla cai usharcanichu. Alpa ucu ucupi ahuarinshna viñajushpapash, na pacajui usharcanichu.

¹⁶Muyushna chaira viñai callarijujpipash, canga ricujushcanguimi. Tucui chaicunataca, cambaj libropimi escribishca carca. Chai jipaca chaicunataca, shujllatapash na illajtami viñachishcangui.

¹⁷¡Taita Dioslla, cambaj jatun yuyaica, ñucapaca juyaillagupachamari! ¡Na yachai ushanalla jatun yuyaicunatamari charingui!

¹⁸Chaicunata ñuca cuentangapaj munajpica, t'iyu alpashnami ashtahuan miran. Puñujushpa rijcharishpapash, canhuanllatami cani.

¹⁹Taita Dioslla, canda na manllaj runataca, causaita quichunguipachami. Huañuchij runacuna, ñuca ladomanda anchurichi.

²⁰Paicunaca, nali shimicunahuanmi candaca rimanajun. Canda fiñajcunaca, cambaj shutitaca yangatami rimanajun.

²¹Mandaj Dioslla, canda millanayachij runacunataca, ¿nachu na ricunayachini? Canda fiñajcunataca, ¿nachu ninandapacha fiñani?

²²Paicunataca ricuitapachami na ricunayan. Paicunataca, ñucata fiñajcunami yashpami ricuni.

²³Taita Dioslla, ñuca shungutaca imashna cajta ricushpa rijsihuayari. Ñuca yuyaicunatapash, imashna cajta ricushpa rijsihuayari.

²⁴Ñuca causaipica, jatun nalita rurarcanipashchari, ricuhuayari. Causaita causana ñangupi pushahuayari.