Read Imbabura Highland Quichua Psalms 14 Bible Online

Psalms 14 - Imbabura Highland Quichua bible

Psalms 14

¹Candajcunata mandaj candachijuchun, David rurashca Salmomi. Shinlli shungu runaca, paipaj shungupica: “Taita Diosca na tianllu” yajunmi. Huaglicuna tucushpami, millanayai juchacunatalla ruranajun. Alita ruraj runaca, pipash na tianllu.

²Mandaj Diosca, huañuna aichayu runacunataca, jahua pachamandami ricujurca. Taita Diosta mascaj, ali yuyaita charij runaca maijanllapash tiambashchari yashpami ricujurca.

³Tucuicunami Diosmanda anchurishpa, huaglicuna tucushca. Alita ruraj runaca, pipash na tianllu, shujllapash na tianllu.

⁴Jatun nalita rurajcunaca, tucuicunallata ima ali cajta, ima nali cajtapash na yachanllu. Ñuca llacta puracunataca, tandata micushpa langanshnami tucuchinajun. Paicunaca, Mandaj Diostaca na mañanllu.

⁵Paicunaca, ninanda manllarishpami chujchunajurca. Imatapash cashcatapacha rurajcunapaj miraicunata, Taita Dios cuidajujpimi chashna chujchunajurca.

⁶Imagutapash na charij runagu ali yuyaita cujujpica, asishpami uyanajurca. Shina cajpipash paica, Mandaj Diostami shuyajun.

⁷¡Israelcunapaj quishpirinaca, Sion urcumanda llujshipashcanman! Pai agllashcacunata prezu apai tucushcamanda, Mandaj Dios tigrachimujpimi, Jacobopaj mirai israelcunaca, ninanda cushijunga.