Read Imbabura Highland Quichua Psalms 140 Bible Online

Psalms 140 - Imbabura Highland Quichua bible

Psalms 140

¹Candajcunata mandaj candachijuchun, David rurashca Salmomi. Mandaj Dioslla, nali runamandaca cacharichihuayari. Llaquichij runacunamandaca huacaichihuayari.

²Paicunapaj shungupica, llaquichinatallami yarianajun. Paicunaca, punllandimi fiñanajunatalla yarianajun.

³Paicunapaj jallutaca, culebrapaj jallu pundatashnami ruranajurca. Paicunapaj shimi ucucunapipash, millai culebrapaj venenoshnami tian. Selah

⁴Mandaj Dioslla, canda na manllaj runapaj maquimanda huacaichihuayari. Nalicachishpa rimaj runacunamandapash cacharichihuayari. Paicunaca, ñuca causaita pandachingapajmi yarinajun.

⁵Jariyashca runacunaca, lazutapash, huascacunatapash, pacallapimi churashca. Ñan ladopimi, linllitapash mandashca, lazucunatapash churashca. Selah

⁶Mandaj Diostaca, cashnami nircani: “Canga, ñuca Taita Diosmi cangui. Mandaj Dioslla, ñuca ninanda mañajujtaca uyahuayari.

⁷Ninan ushaihuan ñucata quishpichij, Mandaj Jatun Dioslla. Canmi, jatun macanajui punllapica, ñuca umata quilparcangui.

⁸Mandaj Dioslla, canda na manllaj runa ima munashcata pactachijuchunga, ama saquipaichu. Pai jariyashpa ama jatun tucuchunga, pai imata yarishcata rurashpa pactachijuchumbash, ama ayudapaichu” nircanimi. Selah

⁹Ñuca muyundipi shayarishpa chaupipi churaj runacunapaca, paicuna nalita rimashcallatami, paicunapaj uma jahuapi urmamunga.

¹⁰Paicunapaj jahuapica, carbón ninayashcacunami urmamunga. Ninapimi shitai tucunga. Maitapash na llujshinalla, manllanayai ucu ucucunamanmi shitai tucunga.

¹¹Jallu cacharishcata rimaj runaca, cai pachapica na unaita causangachu. Jatun llaquica, imatapash cashcatapacha na ruraj runata japishpami tucuchinga.

¹²Mandaj Dioslla, llaquichi tucushpa causajujta can ricushpa mitsanatapash yachanimi. Imagupash illajcuna japinatallata cunatapash yachanimi.

¹³Imatapash cashcatapacha rurajcunaca, cambaj shutita alicachingapachami. Aligutalla rurajcunaca, cambaj ñaupajpimi causanajunga.