Read Imbabura Highland Quichua Psalms 141 Bible Online

Psalms 141 - Imbabura Highland Quichua bible

Psalms 141

¹David rurashca Salmomi. Mandaj Dioslla, candami caparijurcani, ucha ayudahuayari. Canda ñuca mañajujtaca uyahuayari.

²Ñuca mañajuj shimicunaca, inciensota cushnichijpishna cambaj ñaupajman vichai ripachun. Ñuca maquita vichai churashcapash, chishipi imatalla canman carashcashna cachun.

³Mandaj Dioslla, ñuca shimipica, cuidajta churapairi. Ñuca shimitaca, pungupi cuidanshna cuidahuayari.

⁴Ñuca shungupi nalicunatalla ashtahuan yarijuchumbash, ama saquihuaichu. Jatun nalita rurajcunahuan canda na manllashpa, imatalla rurachumbash, ama saquihuaichu. Paicunapaj jatun micuipi cushijuchumbash, ama saquihuaichu.

⁵Imatapash cashcatapacha ruraj runa ñucata llaquichishpaca, alichari canman. Pai ñucata jarcashpa rimashcapash, bálsamo nishca yuramanda juyailla aceiteshnami canman. Paica, ñuca umataca na chugrichinmanllu. Ashtahuangarin chai runacuna nalita rurashcata fiñashpami, candaca mañajushalla.

⁶Paicunapaj juezcunaca, jatun rumicunapimi jahuamanda shitai tucunga. Na llullashpa rimashca ñuca shimitami uyanajunga.

⁷Yapushpa alpata chaupijpishnami, ñucanchi tullucunaca Seol punguman, caita chaita shitai tucushca.

⁸Mandaj Jatun Dioslla. Chaimandami ñuca ñavihuanga, candalla chapariajuni. Canda yariashpami causajurcani. Ñuca almataca, ama jichushpa saquipaichu.

⁹Paicuna churashca lazucunapi urmanamandaca huacaichihuayari. Jatun nalita rurajcunapaj tugllapi japi tucunamandapash huacaichihuayari.

¹⁰Canda na manllajcunaca, paicuna churashca linllicunapillata, tucuilla urmangachu. Ñucaca yalishpa rishallami.