Read Imbabura Highland Quichua Psalms 144 Bible Online

Psalms 144 - Imbabura Highland Quichua bible

Psalms 144

¹David rurashca Salmomi. Ñuca pacajuna jatun Rumishna Mandaj Diosca, alicachi tucushca cachun. Paimi, ñuca rigratapash, ñuca maquitapash, jatun macanajuipaj yachachin.

²Ñucata llaquij, ñucapaj shinlli jatun huasishnami. Ñuca pacajuna, shinlli torreshna ñucata quishpichijmi. Ñuca jarcarina escudoshna cajpimi, paitalla yariajuni. Paimi, ñuca mandajuj gentecunataca, ñucata cazuchun churan.

³Mandaj Dioslla, ¿runaca ima cajpita paitaca yarijupanguiyari? Na cashpaca, ¿imamandata huañuna aichayu runataca, ninan valishcatashna charinguiyari?

⁴Runaca imapash yangashnami. Paipaj causajui punllacunaca, llandushpa yalijunshnami.

⁵Mandaj Dioslla, cambaj jahua pachata pascashpa uriajumupairi. Urcucunapi tacarishpa cushnichipairi.

⁶Punchapamba shitamushpa calpachipairi. Cambaj flechacunata cachashpa manllachipairi.

⁷Jahua pachamanda cambaj maquita chutashpa, jatun yacumanda llujchishpa quishpichihuayari. Na rijsishca runacunapaj maquimanda quishpichihuayari.

⁸Paicunapaj shimica, yangacunatallami riman. Ali lado maquipash llullangapajllami.

⁹Taita Dioslla, canmanmi mushuj candanata candasha. Chunga cuerdayu tocanata, salteriota tocashpami candasha.

¹⁰Canmi, jatun mandajcunamambash, macanajuita mishachij cangui. Canmi, canda servij Davidtaca, llaquichij espadamanda quishpichircangui.

¹¹Na rijsishca runacunapaj maquimanda cacharichishpa quishpichihuayari. Paicunapaj shimica, yangacunatallami riman. Ali lado maquipash llullangapajllami.

¹²Ñucanchi churicunaca, chairalla viñanajuj yuracunashna cachun. Ñucanchi ushicunapash, mandashpa tiajuna huasipi juyailla labrashca huasi tigranacunashna cachun.

¹³Ñucanchi granocunata alichishcacunapash, shuj shuj granocunahuan junda cachun. Ñucanchi animalcunapash michina pambacunapica, huaranga huarangacunapi, chunga huarangacunapi mirachun.

¹⁴Yapungapajpash ñucanchi huagracunaca, shinllicuna cachun. Ñucanchita macashpa quichungapajpash ama shamuchun. Macanajuiman llujshinapash ama tiachun. Ñucanchi plazacunaman llujshishpa caparishpa huacanapash, ama tiachun.

¹⁵Shina ali causaita charij gentecunaca, ninandami cushijun. Gentecunaca, paicunapaj Taita Diosca Mandaj Dios cajpimi, ninanda cushijun.