Read Imbabura Highland Quichua Psalms 145 Bible Online

Psalms 145 - Imbabura Highland Quichua bible

Psalms 145

¹Diosta alicachingapaj, David rurashca Salmomi. Ñuca Taita Dioslla, ñucata Jatun Mandajlla, candami jatunyachijusha. Cambaj shutitaca, causaita causaicamanmi, tucui causaipi alicachijusha.

²Punllandimi, candaca alicachijusha. Cambaj shutitaca, causaita causaicamanmi, tucui causaipi alicachijusha.

³Mandaj Diosca jatumbachami, ninandapacha alicachi tucunatami charin. Pai jatun cajtapash, na yachai ushanallami.

⁴Imatalla can rurashcacunataca, mirai miraicunami yarishpa cushijunajunga. Cambaj ninan ushaihuan rurashcacunatami villanajunga.

⁵Juyailla, punchapamba cambaj ushaitapash, juyaillagucunata can rurashcatapashmi, aligutapacha yarijusha.

⁶Runacunaca, ninan ushaihuan jatun manllarinacunata can rurashcatami villanajunga. Ñucapash, can jatun cajtami villajusha.

⁷Cambaj ninan juyaita yarishpami villanajunga. Imatapash cashcatapacha ruraj cajpimi candanajunga.

⁸Mandaj Diosca llaquij, ali shungumari. Na ñapash fiñarij, ninanda llaquijmari.

⁹Mandaj Diosca tucuicunapajmi aligumari. Tucui pai rurashcacunataca, llaquishpami charin.

¹⁰Mandaj Dioslla, tucui can rurashcacunaca canda alicachinajuchun. Cambajlla causajcunapash, canda alicachinajuchun.

¹¹Can mandajuj llactaca, punchapamba cajta villanajuchun. Cambaj ninan ushaimandapash parlanajuchun.

¹²Shina parlajpimi, huañuna aichayu runacunaca, ninan ushaihuan can rurashcacunataca yachanajunga. Can mandajuj llactapash, punchapamba juyaillagupacha cajtapashmi yachanajunga.

¹³Can mandajuj llactaca, causaita causaicaman mandajuna llactami. Can mandashpa causanaca, tucui mirai miraicunacaman mandanami.

¹⁴Mandaj Diosca, tucui urmanajujcunatami charijun. Llaquichi tucushpa causajcunatapashmi, tucuicunata jatarichijun.

¹⁵Tucuicunami candalla chaparianajun. Paicuna micuchumbash, carana horaspimi carangui.

¹⁶Cambaj maquita pascashpami, causaita charijcunatapash, tucuicunata ninanda bendiciajungui.

¹⁷Mandaj Diosca, tucui imata rurashpapash, imatapash cashcatapachami ruran. Tucui imata rurashpapash, llaquijujlla cashpami ruran.

¹⁸Mandaj Diosca, tucui yuyaihuan paita mañajcunata ayudangapaca ladopimi.

¹⁹Paita manllajcuna, imata munashcataca pactachingami. Shinallata paicuna caparishpa mañashcatapash, uyashpa quishpichingami.

²⁰Mandaj Diosca, paita juyajcunataca tucuitami cuidan. Ashtahuangarin paita na manllajcunataca, tucuillatami tucuchinga.

²¹Ñuca shimica, Mandaj Diosta alicachinatami villajunga. Paipaj jucha illaj shutitaca tucui causaipi, causaita causaicaman tucuicuna alicachinajuchun.