Read Imbabura Highland Quichua Psalms 147 Bible Online

Psalms 147 - Imbabura Highland Quichua bible

Psalms 147

¹Mandaj Diosta alicachinguichi. Ñucanchi Taita Diosman Salmocunata candanaca, alimari. Paita alicachinaca ali, juyaillagumari.

²Mandaj Diosmi, Jerusalendaca shayachijun. Israel llactamanda llujchi tucushcacunatapash tandachimungami.

³Shungu faquirishcacunataca, paimi alichin. Chugricunatapash huatachishpami alichin.

⁴Paica, luzerocuna mashna tiajtapash, cuentashcallami charin. Tucui chaicunataca, shutipimi cayan.

⁵Ñucanchi Jatun Diosca jatumbacha, ninan ushaita charij Diosmi. Paipaj yachaica, na tucurinllu.

⁶Mandaj Diosca, na jariyashcacunataca jatumbimi churan. Paita na manllajcunataca, ninanda pingaichishpami alpacaman cumuchin.

⁷Mandaj Diostaca, candashpa alicachinguichi. Ñucanchi Taita Diostaca, arpata tocashpa candaichi.

⁸Paimi, jahua pachataca fuyuhuan quilpan. Paimi, alpamambash tamiachingapaj alichin. Paimi, urcucunapi jihuacunata viñachin.

⁹Paimi, animalcuna micushpa causachumbash caran. Cuervo nishca animalcunapaj huahuacuna ninanda caparinajujpipash, paimi caran.

¹⁰Paica, caballopaj ushaimandaca na cushijunllu. Ninan shinlli runamandapash, na cushijunllu.

¹¹Mandaj Diosca, paita manllajcunahuanmi cushijun. Pai llaquichun shuyajcunahuanmi cushijun.

¹²Jerusalén, Mandaj Diosta alicachiyari. Sion shuti pueblolla, cambaj Taita Diosta alicachiyari.

¹³Cambaj pungucunapaj aldabacunata ashtahuan shinllita churashcamanda alicachiyari. Cambaj ucupi causanajuj cambaj huahuacunataca bendiciarcami.

¹⁴Paimi, cambaj llactapica casilla causaita caran. Micuchumbash ashtahuan ali trigotami, na munangacaman caranga.

¹⁵Paimi, paipaj Shimita cai pachaman cachamun. Paipaj Shimica, ñapash rinllami.

¹⁶Paimi rasutapash, milmatashna urmachin. Casatapash, uchufatashnami talimun.

¹⁷Paimi, rasutaca asha asha shitamun. Chai chiripica, ¿pita puri ushangayari?

¹⁸Chaicunataca, paipaj Shimihuan rimashpami yacuyachinga. Chai yacucunaca, paipaj huaira fucujpimi jicharinga.

¹⁹Jacobopaj mirai israelcunamanmi, paipaj Shimicunataca villarca. Pactachinajuchun pai cushca shimicunatapash, pai yachachishca shimicunatapashmi curca.

²⁰Maijan llactacunahuambash, chashnataca na rurarcachu. Pai yachachishcacunatacarin, paicunaca na rijsinajurcachu. Mandaj Diosta alicachinguichi.