Read Imbabura Highland Quichua Psalms 148 Bible Online

Psalms 148 - Imbabura Highland Quichua bible

Psalms 148

¹Mandaj Diosta alicachinguichi. Jahua pachapi tiajcuna, Mandaj Diosta alicachinguichi. Jahua pachapi alicachinguichi.

²Tucui paipaj angelcuna, alicachinguichi. Tucui paipaj soldadocunapash, alicachinguichi.

³Indipash, lunapash, alicachinguichi. Punchapamba tucui luzerocunapash, alicachinguichi.

⁴Tucuita yali jahuaman tianajuj jahua pachapash, paita alicachinguichi. Jahua pachapi tiaj yacucunapash, alicachinguichi.

⁵Mandaj Diospaj shutita alicachinguichi. Pai mandajpimi, tucui imapash tiarirca.

⁶Chaicunataca, causaita causaicaman tucui causaipajmi rurarca. Na yangapi churai ushanalla mandashcatami curca.

⁷Cai pachapi tiajcuna, Mandaj Diosta alicachinguichi. Mama cuchapi causaj manllanayai jatun animalcunapash, manllanayai ucu ucu yacucunapash, alicachinguichi.

⁸Ninapash, rundupash, rasupash, fuyupash, pai mandashcata pactachij jatun acapanapash, alicachinguichi.

⁹Urcucunapash, tucui lomacunapash, imalla fucuj quirucunapash, tucui cedro quirucunapash, alicachinguichi.

¹⁰Huasipi charina animalcunapash, tucui animalcunapash, llucashpa purij animalcunapash, alasyu animalcunapash, alicachinguichi.

¹¹Cai pachapi jatun mandajcunapash, tucui gentecunapash, tucui mandajcunapash, tucui cai pacha juezcunapash, alicachinguichi.

¹²Chairalla viñai jaricunapash, jarihuan nara tacarishca cuitsacunapash, rucucunapash, huahuacunapash, alicachinguchi.

¹³Mandaj Diospaj shutita alicachinguichi. Paipaj shutillami jatunyachi tucushca. Paica cai pachapipash, jahua pachapipash, punchapambami tiajun.

¹⁴Pai agllashcacuna mandanataca, paimi jatumbi churashca. Paipajlla causanajuj tucui israelcuna, paipaj ladopi causanajuj pai agllashcacuna, paita alicachinguichi. Mandaj Diosta alicachinguichi.