Read Imbabura Highland Quichua Psalms 17 Bible Online

Psalms 17 - Imbabura Highland Quichua bible

Psalms 17

¹David mañashca shimicunami. Mandaj Dioslla, imatapash cashcatapacha mañajujtaca, aligutapacha uyahuai. Ñuca caparijuctaca uyariajupanguimi. Pitapash na umachij shimihuan mañajujtaca uyahuayari.

²Ñucata mitsanaca, cambaj ladomanda shamupachun. Aliguta rurashcataca, cambaj ñavihuan ricupairi.

³Canmi, ñuca shungu imashna cajtaca ricushcangui. Tutami, ricuj shamupashcangui. Imashna cajta ricungapaj saquishpapash, nalita rurashcataca, na tarircanguichu. Ñuca shimihuanga, ama ashtahuan na cazushpa rimajunatami yarircani.

⁴Nalicunashna imata ruranamandapash, cambaj shimihuan mandashcata cazushpami, paicunapaj ñanda catinataca jarcarircani.

⁵Ñuca chaqui ama lluchachunga, cambaj ñangunapi pushahuayari.

⁶Taita Dioslla, ñucata can uyana cajpimi, candalla mañajuparcani. Ñuca mañashca shimicunataca, rinrita mañachishpa aliguta uyahuayari.

⁷Cambaj ali ladopi pacajujcunataca, canmi quishpichingui. Paicunata fiñashpa llaquichingapaj jatarijcunamambash, cambaj juyailla juyaiguta ricuchipairi.

⁸Cambaj ricujuj ñavigutashna cuidahuayari. Llandujuj cambaj alas ucupi pacahuayari.

⁹Ñucata llaquichij nalicunapaj ñavimandapash, ñucata huañuchingapaj mascajcunamandapash pacahuayari.

¹⁰Paicunaca, ninanda virayashcacunami. Paicunapaj shimihuanga, ninanda jariyashpami rimanajun.

¹¹Cunanga, ñucanchi purina ñandapash jarcashcami tianajun. Paicunaca, ñucanchita alpapi urmachingapajmi ricurianajun.

¹²León micunata japingapaj munashpa chapajunshnami ricurianajun. Maltun león paipaj utujumanda pacalla chapajunshnami ricurianajun.

¹³Mandaj Dioslla, shayaripairi. Paicunata tuparishpa cungurichipairi. Ñuca almataca, nalita rurajcunapaj maquimanda, cambaj espadahuan cacharichihuayari.

¹⁴Mandaj Dioslla, chai runacunapaj maquimandaca, cambaj maquihuan cacharichihuayari. Cai pachapajtalla munaj runacunamandapash cacharichihuayari. Paicuna japinataca, ñami cai causaipillata charin. Paicunaca, can ashtaca juyaillacunata cushcatami, vijsapishna jundachinajun. Paicunapaj churicunamambash, na munajtami caranajun. Uchilla huahuacunapajpash puchunrami.

¹⁵Ashtahuangarin ñucaca, imatapash cashcatapacha ruraj cashcamandami, cambaj ñavitaca ricusha. Ñuca rijcharishpaca, canman rijchaj cashpami ninanda cushijusha.