Read Imbabura Highland Quichua Psalms 18 Bible Online

Psalms 18 - Imbabura Highland Quichua bible

Psalms 18

¹Candajcunata mandaj candachijuchun, Mandaj Diosta servij David rurashca Salmomi. Paita tucui fiñajcunapaj maquimandapash, Saulpaj maquimandapash, Mandaj Dios cacharichijui punllami, Mandaj Diosman cai shimicunata candashpa, cashna nijurca: Ñuca shinlli torreshna Mandaj Dioslla, candaca juyanimari.

²Mandaj Diosca, ñucapaca jatun Rumishnami. Shinlli jatun huasishna ñucata pacaj, ñucata cacharichijmi. Ñuca shinlli torreshna ñuca Taita Dioslla. Paitami yariajusha. Ñuca jarcarina escudomi. Ninan ushaita charij, ñucata quishpichijmi, jahua jahuapi ñuca pacajunami.

³Mandaj Diostami mañasha. Paimi, alicachi tucunatapacha charin. Paita mañashpami, ñucata fiñajcunamandaca quishpirisha.

⁴Huañuica, huatashpami muyundi pillushpa charihuarca. Jatun nalicunapash, ninanda jatarij huaicu yacushnami ninanda manllachihuarca.

⁵Seolca huatashpami, muyundi pillushpa charihuarca. Huañuchij lazutami churahuarca.

⁶Chashna ninan llaquihuan cashpami, Mandaj Diostaca mañarcani. Ñuca Taita Diostami caparircani. Paimi, ñuca mañajujtaca, paipaj huasimandapacha uyahuarca. Ñuca caparishcapash, paipaj ñaupajman chayashpami, paipaj rinriman uyarirca.

⁷Cai pachaca, ninanda cuyuchijpimi chujchurca. Urcucunata charijuj callari rumicunapashmi cuyurirca. Dios fiñarijpimi, chashna chujchunajurca.

⁸Paipaj singamandaca, cushni llujshishpami vichai rijurca. Paipaj shimimandaca, tucuchij ninami llujshijurca. Carbongunapash, pai japichijpimi japirirca.

⁹Jahua pachata pascashpami, urai shamurca. Paipaj chaqui ucupica, yana yana, sangu fuyumi carca.

¹⁰Paica, shuj querubín nishcapi tiarishpami jahuata rirca. Huaira alascunapaj jahuapimi rijurca.

¹¹Paita pacachunga, yana yana tutatami, paipaj cortinashna cachun, paipaj muyundipi churarca. Jahua pachapica, tamianalla yana yana fuyutami churarca.

¹²Pai punchapamba ricurijpimi, paipaj fuyucunaca anchurirca. Rundupash, rupajuj carbongunapashmi urmamurca.

¹³Mandaj Diosca, jahua pachapimi culun nichijurca. Jahua pachapi causajuj Diosmi rimamurca. Rundupash, rupajuj carbongunapashmi urmamurca.

¹⁴Paipaj flechacunata cachamushpami, fiñajcunataca caita chaita cacharca. Paipaj punchapambata shitamunacunata cachamushpami, paicunataca tucuchirca.

¹⁵Shinamandami, mama cucha yana yana utujupash ricurirca. Cai pacha callari rumicunapashmi, ricunalla quedarca. Can Mandaj Dios shinllita rimashpa, cambaj singa samaihuan fucujpimi, chashna tucurca.

¹⁶Jahua pachamanda cachamushpami ñucataca, ashtaca yacucunamanda japishpa llujchihuarca.

¹⁷Ñucataca, ninan ushaita charij ñucata fiñajmandapash, ñucata millanayachij runacunamandapashmi cacharichihuarca. Paicuna ñucata ashtahuan yali shinllicuna cajpipash, llujchircallami.

¹⁸Ninan llaquihuan purijui punllami, ñucataca ashtahuan llaquichingapaj japihuarca. Ashtahuangarin Mandaj Diosmi, ñucataca shinllichihuarca.

¹⁹Jatun pambamanmi llujchihuarca, ñucata alicachishpami cacharichihuarca.

²⁰Mandaj Diosca, imatapash cashcatapacha ñuca rurashcashnallatami, alita carahuarca. Ñuca maquihuan ima mapatapash na rurashcashnallatami, alita tigrachihuarca.

²¹Ñucaca, Mandaj Dios mandashcatami cazurcani. Ñuca Taita Diosmanda ama anchuringapaca, paita manllashpami causarcani.

²²Tucui imatalla pai yachachishcacunami, ñuca ñaupajpi carca. Pactachinajuchun cushca paipaj Shimicunamandaca, na anchurishcanichu.

²³Paipaj ñaupajpica, aligutami causarcani. Nalita ruranamandapash jarcarircanimi.

²⁴Chaimandami Mandaj Diosca, imatapash cashcatapacha ñuca rurashcashnallata, alita carahuarca. Ñuca maquihuan paipaj ñaupajpi ima mapata na rurashcashnallatami, alita carahuarca.

²⁵Llaquij runahuanga, cambash llaquij cajtami ricuchingui. Ima nalitapash na ruraj runapaca, cambash aligutami rurangui.

²⁶Ima mapapash illaj runapaca, cambash ima mapapash illaj cajtami ricuchingui. Ashtahuangarin jatun nalita rurajtaca, ninandami llaquichingui.

²⁷Canmi, llaquihuan causaj gentecunataca quishpichingui. Ashtahuangarin jariyashcacunapaj ñavitaca, urai cumuchinguimi.

²⁸Canmi, ñuca lamparataca japichipangui. Ñucata Mandaj Taita Diosmi, ñuca yana yana tutatapash punchayachinga.

²⁹Canhuanga, ashtaca soldadocunatapash mishashallami. Ñuca Taita Dioshuanga, jatun pircacunatapash urmachishpa yalishallami.

³⁰Taita Diosta ricujpica, ima pandapash na tianllu. Mandaj Dios rimashca shimicunaca, culquita rupachishpa tucui mapata anchuchishcashnami. Paita tucui shuyajcunapaca, jarcarina escudoshnami.

³¹Shina cashpaca, ¿pita Taita Dios? Mandaj Diosllami tian. Jatun Rumishna, ñucanchi Taita Diosmanda shujca, ¿pita tian?

³²Taita Diosmi, chumbilichinshna ushaita cuhuan. Paillatami, ñuca purina ñandaca aliguta alichijun.

³³Paimi, ñuca chaquitaca, tarugashna ucha calpajta ruran. Urcu jahuacunapipash, paimi shinllita shayachihuan.

³⁴Paimi, jatun macanajuipi macanajuchumbash, ñuca maquita yachachin. Bronce arcota ñuca rigrahuan chutanatapashmi yachachin.

³⁵Shinallata quishpichij cambaj escudotapashmi cuhuarcangui. Cambaj ali lado maquihuanmi charihuarcangui. Cambaj juyaihuanmi, jatun canapi churahuarcangui.

³⁶Ñuca purina ñandaca, rinallagutami rurarcangui. Chaimandami ñuca chaquica, na llucharca.

³⁷Ñucata fiñajcunata catishpa rishpaca japircanimi. Paicunata tucuchingacaman na tigrarcanichu.

³⁸Paicunataca, na jatari ushangacamanmi chugrichircani. Ñuca chaqui ucucunapimi urmanajurca.

³⁹Macanajuchunga, chumbilichinshnami ushaita cuhuarcangui. Ñucata fiñajcunataca, ñuca ñaupajpimi urai cumuchircangui.

⁴⁰Ñucata fiñajcunataca, tigrachishpami calpachircangui. Ñucata na ricunayachij runacunata tucuchijuchunmi, chashna rurarcangui.

⁴¹Caparinajujpipash paicunata quishpichijca, pipash na tiarcachu. Mandaj Diostapashmi mañanajurca. Ashtahuangarin paicunataca na uyarcachu.

⁴²Paicunataca huairapi, ñutu alpata ñutunshnami tucuchircani. Ñangunapi sirij turuta shitanshnami, llujchishpa cacharcani.

⁴³Fiñashpa rimaj gentecunamandaca cacharichihuarcanguimi. Llactacunapaj umashna cachunmi churahuarcangui. Ñuca na rijsishca gentecunami, ñucata servinajurca.

⁴⁴Ñuca rimajta uyashpallami cazunajurca. Na rijsishca gentecunapaj churicunami, ñucata cazushpa causanajurca.

⁴⁵Na rijsishca gentecunaca, ushai illaj tucushpami, paicuna pacajushca ucucunamandaca, chujchushpa llujshinajurca.

⁴⁶Mandaj Diosca causajupachunlla. Jatun Rumishna ñuca Diosca, alicachi tucushca cachun. Ñucata quishpichij Taita Diosca, jatunyachi tucushca cachun.

⁴⁷Ñucata llaquichishcamandaca, chashnallata llaquichij Taita Diosmi. Gentecunataca, ñucata cazuchunmi ñuca chaqui ucupi churan.

⁴⁸Paimi, ñucata fiñajcunamandaca cacharichihuan. Ñucata llaquichingapaj jatarinajujpipash, ashtahuan alipi churashpami jatunyachihuan. Huañuchij runapaj maquimandapashmi cacharichihuarcangui.

⁴⁹Mandaj Dioslla, shinamandami shuj llactacunapipash, canmanda villajusha. Cambaj shutitapashmi candajusha.

⁵⁰Paipaj jatun mandajtaca, jatun macanajuicunatami mishachin. Aceitehuan javi tucushca, paipaj jatun mandajtaca ninandami llaquin. Davidtapash, paipaj miraicunatapash, causaita causaicamanmi chashnallata charin.