Read Imbabura Highland Quichua Psalms 19 Bible Online

Psalms 19 - Imbabura Highland Quichua bible

Psalms 19

¹Candajcunata mandaj candachijuchun, David rurashca Salmomi. Jahua pachaca, Taita Dios punchapamba cajtami villajun. Chaipi imalla tiajcunapash, paipaj maquihuan rurashcatami villajun.

²Shuj punllapash, caishuj punllamanmi villashpa yalichijun. Shuj tutapash, caishuj tutamanmi ali yachaitaca villajun.

³Shuj rimaita rimanaca na tianllu, ima shimicunapash na tianllu. Pai rimashcapash, na uyarinllu.

⁴Ashtahuangarin pai rimashcacunaca, tucui cai pachamanmi llujshirca. Pai rimashca shimicunaca, cai pacha tucuri manñacamanmi llujshirca. Chaicunapimi, indimambash carpata churarca.

⁵Indica, chairalla cazarashcacunapaj huasi ucumanda cusa llujshinshnami llujshijun. Shina llujshishpaca, ñanda calpagrijuj manllanayai jatun runashnami ninanda cushijun.

⁶Pai llujshinaca, jahua pacha shuj ladomandami. Pai rishpa muyunaca, jahua pacha tucuri caishuj ladocamanmi. Paipaj rupaimandaca, imapash na pacajui ushanllu.

⁷Mandaj Dios mandashcacunaca, ima pandapash illaj cashpami, almataca mushuj causaiman tigrachin. Imashna causanata Mandaj Dios yachachishca shimicunaca, imatapash pactachij cashpami, yanga runataca, alipacha yachajushcata ruran.

⁸Mandaj Dios mandashcacunaca, imapajpash alipacha cashpami, shungutaca cushichin. Mandaj Dios imatalla rurai nishcacunaca, ima mapapash illaj cashpami, ñavitaca punchayachin.

⁹Mandaj Diosta manllanaca, ima mapapash illajmi. Chaica, causaita causaicaman na tucurinllu. Mandaj Dios mandashcacunaca, na llullachu. Tucuillami imatapash cashcatapacha mandan.

¹⁰Orotapash ashtahuan yali munanayaimi. Ashtahuan ali ashtaca orotapash yali, munanayai shimicunami. Balun mishquitapash yali mishquimi. Balun mishqui shinlliyashcamanda talirijujtapash yali mishquimi.

¹¹Canda servij ñucaca, chai shimicunahuanga alipacha yachachi tucushcami cani. Chaicunata cazushpaca, alitapacha japinami tian.

¹²Paillata pandarishcataca, ¿pita yachai ushanga? Pacalla tiaj ñuca juchacunamandaca cacharichihuayari.

¹³Shinallata canda servij ñucataca, jariyashpa jatun tucuna yuyaicunamandapash huacaichihuayari. Chai yuyaicuna ñucata mandachunga, ama saquihuaichu. Shina cajpimi, ima nalitapash na rurasha. Shinallata na cazuj canapash, mapa illajpashmi casha.

¹⁴Mandaj Dioslla, jatun Rumishna ñuca Dioslla, ñucata quishpichijmi cangui. Ñuca shimihuan nishcacunapash, ñuca shungupi yarijushcapash, cambaj ñaupajpica chasqui ushanalla cachun.