Read Imbabura Highland Quichua Psalms 2 Bible Online

Psalms 2 - Imbabura Highland Quichua bible

Psalms 2

¹¿Imashpata gentecunaca ninanda caparinajun? Shuj llactapi causajcunapash, ¿imashpata yangacunata yarinajun?

²Cai pachapi tiaj jatun mandajcunaca jataringami. Cati mandajcunapash tandanajushpami, Mandaj Diostapash, aceiteta talishpa javi tucushca jatun mandajtapash fiñashpa, cashna nishpa parlarinajunga:

³“Pai huatashcacunataca fitishunchi. Ñucanchita huatashpa charijuj cabiacunata fitishpa shitashunchi” ninajungami.

⁴Jahua pachapi causajuj Diosca asingami. Jatun Diosca, paicunataca asishpami ricunga.

⁵Chai jipaca, ninandapacha fiñarishpami, paicunataca rimanga. Pai chashna fiñarishpami, muspachishpa pandachinga.

⁶“Ashtahuangarin ñucaca, ñucapajlla shicanyachishca Sion urcu jahuapimi, ñucapaj jatun mandajta churarcani” nijurcami.

⁷Ñucaca, imata rurachun mandashcataca villashami. Mandaj Diosca, cashnami nihuarca: “Canga, ñuca churimi cangui. Ñucami, causaita cunan canman curcani.

⁸Mañahuailla, llactacunatapash cambaj cachun cushallami. Cai pacha callari manñacunapi tiaj llactacunatapash, cambajlla cachun cushallami.

⁹Paicunataca, jirru varahuanmi llaquichingui. Mangata ruraj runapaj alpa mangatashnami ñutungui” nihuarcami.

¹⁰Jatun mandajcunalla, cunanga aligutapacha yarishpa causaichi. Cai pachapi tiaj juezcuna, shinllita tacurishcata cazuichi.

¹¹Mandaj Diostaca, manllaihuan servishpa causaichi. Cushijuitapash chujchushpa cushijuichi.

¹²Pai fiñarijpi ñambi ama huañungapaca, paipaj Churitami alicachina canguichi. Paica, nina japirinshna ñapash fiñarinllami. Paita yariashpa causajcunaca, tucuicunami ninanda cushijun.