Read Imbabura Highland Quichua Psalms 20 Bible Online

Psalms 20 - Imbabura Highland Quichua bible

Psalms 20

¹Candajcunata mandaj candachijuchun, David rurashca Salmomi. Macanajui punllapi can mañajpica, Mandaj Dios uyachun. Canmandaca, Jacobopaj Taita Diospaj shutipi mitsashpa jarcachun.

²Candaca, Sionbi tiaj paipajlla huasimandapacha ayudashpa charichun.

³Can tucui imatalla carashcacunataca, yarishpami ali canman. Diosman cushpa tucuillata can rupachishcatapash, chasquishpami ali canman. Selah

⁴Cambaj shungu munashcashnallata, cushpami ali canman. Can imatalla yarijushcataca, pactachishpami ali canman.

⁵Ñucanchica, can quishpichijpimi cushijushun. Ñucanchi Taita Diospaj shutipimi, banderatapash alsashun. Tucui imatalla can mañashcacunataca, Mandaj Dios cupachun.

⁶Mandaj Diosca, aceitehuan javi tucushca, paipaj jatun mandajta quishpichij cajtaca, cunanmi yachani. Paipajlla jahua pachamandapacha uyashpami, ushaita charij paipaj ali lado maquihuan quishpichin.

⁷Cai runacunaca carretacunata, caishuj runacunaca, caballocunatami yarianajun. Ashtahuangarin ñucanchica, ñucanchita Mandaj Taita Diospaj shutitami yariashpa causashun.

⁸Paicunaca, jamziyanshnami urmanajun. Ashtahuangarin ñucanchica, jatarishpami shayanajunchi.

⁹Mandaj Dioslla, quishpichipairi. Jatun Mandajca, ñucanchi mañajui punllapica uyapachunlla.