Read Imbabura Highland Quichua Psalms 21 Bible Online

Psalms 21 - Imbabura Highland Quichua bible

Psalms 21

¹Candajcunata mandaj candachijuchun, David rurashca Salmomi. Mandaj Dioslla, jatun mandajca cambaj ushaihuanmi cushijun. Can quishpichishcamandaca, ¡cashnamari cushijun!

²Paipaj shungu munashcatami, paiman rurashcangui. Paipaj shimihuan mañashcatapash, na mitsashpami cararcangui. Selah

³Paitaca, ashtaca alicunahuanmi tuparingapaj llujshircangui. Umapipash, ashtahuan ali oro coronatami churachircangui.

⁴Causaita mañajpipash, causaitapash curcanguillami. Causaita causachunmi, ashtaca huatacunata curcangui.

⁵Can paita quishpichishpami, punchapambagumi cangui nircangui. Alicachi tucunatapash, jatun canatapashmi paiman curcangui.

⁶Paitaca, causaita causaipajmi bendiciarcangui. Can paihuan cashpami, ninanda cushichircangui.

⁷Shinamandami jatun mandajca, jahua pachapi causajuj Mandaj Dios llaquinata yariashpa causajun. Shina cashpami, na cuyuchi tucunga.

⁸Cambaj maquica, tucui canda fiñajcunatami llaquichinga. Cambaj ali lado maquica, canda millanayachij runacunatami llaquichinga.

⁹Can fiñarishca huatapica, ninata jornopi churanshnami llaquichingui. Mandaj Dios ninanda fiñarijpimi, paicunataca nina tucuchinga.

¹⁰Paicunapaj huahuacunataca, cai pachamanda chingachinguimi. Paicunapaj miraitapash, huañuna aichayu runa puramandaca chingachinguimi.

¹¹Canda fiñashpa llaquichingapajmi munanajurca. Canda umachingapajmi nalita yarinajurca. Ashtahuangarin paicunaca na mishai ushangachu.

¹²Ashtahuangarin canmi, paicunataca calpachingui. Cambaj arcohuanmi, flechacunata paicunapaj ñavipi shitangapaj shayaringui.

¹³Mandaj Dioslla, cambaj ushaihuan jatun cajta ricuchipairi. Cambaj ninan ushaitami, candashpa alicachipashun.