Read Imbabura Highland Quichua Psalms 22 Bible Online

Psalms 22 - Imbabura Highland Quichua bible

Psalms 22

¹Tutamandata purij Taruga nishpa candana tonopi, candajcunata mandaj candachijuchun, David rurashca Salmomi. Ñuca Taita Dioslla, ñuca Taita Dioslla. ¿Imashpata ñucataca jichuhuanguiyari? ¿Imashpata ñucata quishpichinamandapash, ñuca caparijujta uyanamandapash, carupi capanguiyari?

²Ñuca Taita Dioslla, punlla mañajpipash, na tigrachihuanguica. Ñuca samanaca, tutapash na tianllu.

³Ashtahuangarin canmi, jucha illaj capangui. Canga, israelcuna alicachinajuj chaupipimi causajungui.

⁴Ñucanchi ñaupa taitacunaca, candami shuyanajurca. Shuyanajujpimi, canga cacharichimurcangui.

⁵Canda caparishpa mañashpaca, cacharichi tucurcallami. Canda yariashpa causajcunaca, na pingaichi tucunajurcachu.

⁶Ashtahuangarin ñucaca, jurushnami cani, na runashna canichu. Runacuna nalicachishpa rimai tucushca, gentecunapi na ricunayachi tucushcami cani.

⁷Ñucata tucui ricujcunami, asishpa ricunajun. Shimita vishtushpa umata muyuchishpami, cashna ninajun:

⁸“Cai runaca, Mandaj Diospaj maquipimi mingarirca. Paihuanmi cushijun carca. Shina cashpaca, paillata cacharichishpa quishpichijuchunyari” ninajunmi.

⁹Ashtahuangarin canmi, ñucataca vijsa ucumanda llujchihuarcangui. Canmi ñucataca, chuchujujpillata canda yariaj causachun rurahuarcangui.

¹⁰Nara huacharishpallatami, cambaj maquipi mingashca carcani. Ñuca mamapaj vijsapi cashcamandapacha, canmi ñuca Taita Dios cangui.

¹¹Ñucamandaca ama caruyapaichu. Ninan llaquicunamari chayamugrin. Ayudangapajpash pipash na tianga.

¹²Ñucataca, ashtaca huagracunashnami muyushca. Basán llactamanda ninan shinlli huagracunashnami muyushca.

¹³Ninan millai león huacajunshnami, ñucata llaquichingapaj shimita pascanajun.

¹⁴Yacu talirijunshnami tucurijuni. Ñuca tullu mucucunapash, ladomanmi llujshishca. Ñuca shunguca, vijsa ucupica vira yacuyashpa tucurijunshnami.

¹⁵Ñuca ushaipash, callana chaquinshnami tucurishca. Ñuca jallupash, chaquishpami shimi jahuaman llutarirca. Ñucataca, huañushpa sirijuna ñutu alpapimi churahuashcangui.

¹⁶Nalita ruraj, alcushna runacunami, tandanajushpa ñuca muyundipi shayanajun. Ñuca maquitapash, chaquitapashmi utujushpa chugrichinajuhuarca.

¹⁷Ñuca tullucunatapash, tucuillata cuentai ushanillami. Shina cuentajujtami, paicunaca chapashpa ali ricurianajuhuan.

¹⁸Ñuca churajunataca, paicuna purami chaupirinajurca. Chai churajuna jahuapillatami, suertetapash ruranajurca.

¹⁹Ashtahuangarin can Mandaj Diosca, ama caruyapaichu. Ñuca shinlli torreshna Dioslla, ñucata ayudangapaj ucha shamupairi.

²⁰Espadahuan huañuchi tucunamanda, ñuca almata cacharichihuayari. Alcushna nali gentecunapaj ushaimandaca, ñuca causaita quishpichihuayari.

²¹Leonbaj shimimandashna quishpichihuayari. Búfalo nishca huagracunapaj cachucunamandashna cacharichihuayari.

²²Cambaj shutitaca, ñuca huauquicunamambash villashami. Tandanajushcacunapaj chaupipimi, candaca alicachisha.

²³Mandaj Diosta manllajcunaca, alicachinguichi. Jacobopaj tucui miraicunaca, paitami punchapambagumi cangui nina canguichi. Israelpaj miraicunaca, tucuicuna paita manllaichi.

²⁴Paica, llaquichi tucushpa causajpaj llaquitaca, na yangapi churashpa millanayachircachu. Paimandaca, ñavitapash na shujman churarcachu, ashtahuangarin paita mañajpica uyarcallami.

²⁵Jatun tandanajuipica, candami alicachisha. Canman imatalla cusha nishcataca, canda manllajcunapaj ñaupajpimi cusha.

²⁶Na jariyashpa causajcunami, na munangacaman micunajunga. Mandaj Diosta mascajcunami, paita alicachinajunga. Cangunapaj shungupica, causaita causanatami charinguichi.

²⁷Cai pacha manñacunapi tucui causajcunami, Mandaj Diosta yarishpa tigrarinajunga. Tucui llactacunapi causaj familiacunami, cambaj ñaupajpi alicachinajunga.

²⁸Mandanaca, Mandaj Diospajmi. Paimi, tucui llactacunata mandanga.

²⁹Cai pachapi ushaita tucui charijcunami micushpa, paita alicachinajunga. Huañushpa ñutu alpaman urai rijcunaca, tucuicunami paipaj ñaupajpi cungurinajunga. Paipaj almata causaihuan na chari ushajcunapashmi cungurinajunga.

³⁰Jipa miraicunami, paitaca servinajunga. Caitaca Mandaj Diosmandami, tucui jipa miraicunamambash villanajunga.

³¹Pai imatapash cashcatapacha rurashcataca, shamushpami villanajunga. Pai caita rurashcataca, nara huacharishca gentecunamambashmi villanajunga.