Read Imbabura Highland Quichua Psalms 25 Bible Online

Psalms 25 - Imbabura Highland Quichua bible

Psalms 25

¹David rurashca Salmomi. Mandaj Dioslla, candami tucui ñuca almahuan mañasha.

²Ñuca Dioslla, candami yariashpa causani. Ñuca pingai tucuchunga, ama saquihuaichu. Ñucata fiñajcuna cushijuchunga, ama saquihuaichu.

³Canda tucui shuyajcunaca, napacha pandachi tucungachu. Canda yangamanda jariyajcunaca, pingaichi tucunajungami.

⁴Mandaj Dioslla, cambaj ñangunata ricuchihuai. Cambaj chaqui ñangunapi purinata yachachihuai.

⁵Na llullaj cambaj ñambi purinata yachachihuai. Canmi, ñucata quishpichij Taita Dios cangui. Candami, tucui punllacunapi shuyajuni.

⁶Mandaj Dioslla, causaita causaicaman can ninanda juyaj, llaquij cashcata yaripai.

⁷Chairalla viñai cashpa juchata ñuca rurashcata, na cazushcataca ama yaripaichu. Mandaj Dioslla, cambaj juyaimandaca, can imashna llaquinshnallata yarihuai.

⁸Mandaj Diosca, alitalla ruraj aligupachamari. Shinamandami juchata rurajcunataca, ali ñanda catichun yachachinga.

⁹Na jariyashcacunataca, paipaj ali ñambimi pushanga. Ali shungucunatapash, ali catichunmi yachachinga.

¹⁰Mandaj Diospaj tucui ñangunaca llaquina, na llullanami. Chaicunaca, paihuan ari ninajushcata, imashna causanata yachachishca shimicunata pactachijcunapajmi.

¹¹Mandaj Dioslla, cambaj shutiguta juyaimanda, ñuca jatun juchatapash cungapangui.

¹²¿Maijan runata Mandaj Diosta manllashpa causan? Diosllatami, maijan ñanda agllanatapash ricuchinga.

¹³Chai runaca, aliguta causashpami cushijunga. Paipaj miraicunapashmi, chai llactata japinga.

¹⁴Mandaj Diosca, paita manllajcunahuanmi alipacha cumba tucun. Paicunamanmi, paihuan ari ninajushcatapash pactachishpa ricuchinga.

¹⁵Linllipi ñuca chaqui japi tucushcata pai llujchina cajpimi, ñuca ñavihuanga tucui causaipi Mandaj Diostalla ricuriajuni.

¹⁶Ñucataca ricuhuayari, llaquihuayari. Ñucallamari cani, llaquihuanmari cani.

¹⁷Ñuca shungupi llaquicunaca, ashtahuanmari mirashca. Cai ninan llaquicunamandaca llujchihuayari.

¹⁸Llaquita ñuca apashpa causajujtaca ricuhuayari. Tucui ñuca juchacunatapash cungapairi.

¹⁹Ñucata fiñajcuna, imashna mirashcatapash ricupairi. Paicunaca, manllanayaita fiñashpami, na ricunayachihuan.

²⁰Ñuca almaguta cuidashpa, llaquimanda cacharichihuayari. Ñuca pingai tucuchunga ama saquihuaichu, candallami yariashpa causajupani.

²¹Candalla shuyajushcamandaca, ima nalitapash na rurana, aligutalla rurana yuyai ñucataca cuidahuachun.

²²Taita Dioslla, israelcunataca, paicunapaj tucui llaquicunamanda llujchipairi.