Read Imbabura Highland Quichua Psalms 26 Bible Online

Psalms 26 - Imbabura Highland Quichua bible

Psalms 26

¹David rurashca Salmomi. Mandaj Dioslla, ricuhuayari. Ñucaca, ima nalitapash na rurashpami purijushcani. Shinallata na pandashpallami, Mandaj Diostalla yariashpa shuyajushcani.

²Mandaj Dioslla, ñuca imashna cajtaca aligutapacha ricuhuayari. Ali cajta, nali cajtapash ricuhuayari. Ñuca tucui yuyaicunapash, ñuca shungupash imashna cajta ricuhuayari.

³Can llaquinaca, ñuca ñaupajpi cajpimi, cambaj na llullaj shimita catishpa purini.

⁴Mishqui shimi jayaj shungu runacunahuanga, na tiarircanichu. Ñavi ricuipilla ali tucushcacunahuambash, na tandanajurcanichu.

⁵Nali runacunapaj tandanajuitaca millanayachircanimi. Canda na manllajcunahuambash, ima horallapash na tiarircanichu.

⁶Mandaj Dioslla, ñucaca ima nalitapash na rurashca ricurishpami, ñuca maquita maillashpa, cambaj altar muyundipi purijusha.

⁷Canda pashi nishpa candangapaj, tucui ima juyaillacunata can rurashcata villangapajmi, chashna causajusha.

⁸Mandaj Dioslla, can causajuj huasigutaca juyapanimi. Can punchapamba tiajuj pushtugutapash juyapanimi.

⁹Ñuca almataca, juchata rurajcunahuanga, ama apahuaichu. Ñuca causaitapash, huañuchij runacunahuanga ama apahuaichu.

¹⁰Paicunapaj maquipica, nalita ruranallami tian. Paicunapaj ali lado maquipash, pacalla cushca culquihuan jundami.

¹¹Ashtahuangarin ñucaca, ima nalitapash na rurashpami purisha. Quishpichihuayari, ñucataca llaquihuayari.

¹²Ñuca chaquihuanga, ali ñambimi purishcani. Jatun tandanajuicunapimi, Mandaj Diostaca aligumari cangui nijusha.