Read Imbabura Highland Quichua Psalms 27 Bible Online

Psalms 27 - Imbabura Highland Quichua bible

Psalms 27

¹David rurashca Salmomi. Mandaj Diosca, ñucapaj michami, ñucata quishpichijmi. ¿Pitata manllana cani? Mandaj Diosca, ñuca causaipaj shinlli torreshnami. ¿Pitata manllana cani?

²Nalita rurajcuna, ñucata llaquichijcuna, ñucata fiñajcuna ñucata micunshna llaquichingapaj tandanajushpaca, paicunarami nitijashpa urmanajurca.

³Ashtaca soldadocuna ñucata chaupipi churajpipash, ñuca shungupica na manllashachu. Ñucata fiñashpa macanajungapaj jatarijpipash, ñucaca imatapash na manllashachu.

⁴Shuj mañanagutallami, Mandaj Diostaca mañarcani. Chaitami mascasha. Tucui ñuca causaipi, Mandaj Diospaj huasipi cashpa, Mandaj Dios juyaillagu cajta ricungapaj, paipaj huasipi tapushpa yachangapajmi mañarcani.

⁵Nali punllapica, paimi paipaj jatun carpapi pacahuanga. Paipajlla shicanyachishca ucupimi pacahuanga. Shuj jatun rumi jahuapimi, jahua jahuapi shayachihuanga.

⁶Chai jipami, ñuca muyundipi tiaj ñucata fiñajcunapaj ñaupajpi, umata alsanshna ali canapi churahuanga. Ñucaca, ninan cushijuihuan carashpa huañuchina animalcunatami, paipaj jatun carpapi carashpa huañuchisha. Mandaj Diostaca candashpa, tocashpami alicachijusha.

⁷Mandaj Dioslla, caparishpa, canda mañajujtaca uyahuayari. Ñucata llaquishpa, ñuca mañashcatapash tigrachihuayari.

⁸Ñuca shunguca, canmandaca: “Paita mascaichi” nihuarcami. Mandaj Dioslla, candallami mascasha.

⁹Cambaj ñavitaca, ñucamanda ama shujman churapaichu. Canda servij ñucataca, ama fiñashpa anchuchihuaichu. Ñucata ayudajmari capangui. Ñucata quishpichij Taita Dioslla, ama saquihuaichu, ama jichuhuaichu.

¹⁰Ñuca taita mama jichujpipash, Mandaj Diosmi japihuanga.

¹¹Mandaj Dioslla, ñucata fiñajcuna ama juchachinajuchunga, cambaj ñambi purinata yachachihuayari. Ali ñanda pushahuayari.

¹²Ñucata fiñajcuna paicuna munashcata rurachunga, ama paicunaman saquihuaichu. Paicunaca ñucata fiñashpami, llullashpa villangapaj, ñucata huañuchingapaj munashpa jatarishca.

¹³Runacuna causanajuj cai pachapi, Mandaj Diospaj juyaita na crishpaca, huañuimanmi carcani.

¹⁴Mandaj Diosta chapariajuilla. Cambaj shungupica, shinlli tucushpa ama shaijuichu. Ari, Mandaj Diosta shuyajuilla.