Read Imbabura Highland Quichua Psalms 28 Bible Online

Psalms 28 - Imbabura Highland Quichua bible

Psalms 28

¹David rurashca Salmomi. Mandaj Dioslla, candami caparishpa mañapasha. Jatun Rumishna ñuca Dioslla. Ñuca mañajujtaca, ama uyaj tucupaichu. Ñucata can saquijpica, huañushcata pambana utujuman urai rijcunashna ama cangapajmi, chashna mañapani.

²Caparishpa, canda ñuca mañajujtaca uyahuayari. Cambajlla huasi ladoman, maquita vichai churashpa mañajujtaca uyahuayari.

³Ñucataca, chai nalita ruraj runacunahuan, jatun nalita rurajcunahuanga, ama tandachishpa apahuaichu. Paicunaca, pihuan parlashpapash casilla ali causaitami parlanajun. Ashtahuangarin paipaj shungupica, nalitamari yarinajun.

⁴Paicuna imata rurashcashnallata cupairi. Paicuna jatun nalita rurashcashnallata tigrachipairi. Paicunapaj maquihuan imatalla rurashcamandaca, japinatallata cupairi.

⁵Paicunaca, Mandaj Dios rurashcacunata na yarinajurcachu. Paipaj maquihuan imatalla rurashcacunatapash, na yarinajurcachu. Chaimandami paicunata urmachishpaca, cutinga na shayachinga.

⁶Mandaj Diosca, alicachi tucushca cachun. Paimi, ñuca ninanda mañashca shimicunataca uyarca.

⁷Mandaj Diosca, ñucapaj shinlli torreshnapash, ñuca jarcarina escudoshnapashmi. Ñuca shungupica, paitalla yariajpimi ayudahuarca. Chaimandami, ñuca shungupica cushijurcani. Ñuca rurashca candanahuanmi, paitaca alicachisha.

⁸Mandaj Diosca, pai agllashcacunapaca shinlli torreshnami. Aceitehuan javi tucushca paipaj jatun mandajtaca, pacashpami quishpichin.

⁹Can agllashcacunataca quishpichipairi, cambajlla gentecunataca bendiciapairi. Paicunapaj tucui causaipi michishpa, cuidashpa pushapairi.