Read Imbabura Highland Quichua Psalms 30 Bible Online

Psalms 30 - Imbabura Highland Quichua bible

Psalms 30

¹Diospaj huasita mingajui punllapi candashca Salmomi. David rurashca Salmomi. Mandaj Dioslla, ñucata jatunyachishcamandami, candapash alicachisha. Ñucata fiñajcuna cushijuchumbash, na saquircanguichu.

²Ñucata Mandaj Taita Dioslla, canda caparishpa mañajpimi, huañujujtapash alichihuarcangui.

³Mandaj Dioslla, ñuca almataca Seolmandami vichai llujchihuarcangui. Pambana utujuman ama richunmi, causaita cuhuarcangui.

⁴Mandaj Diospajlla causajcunaca, paita candaichi. Pai jucha illaj cajta yarishpa cushijuichi.

⁵Pai ninanda fiñarinaca, ashacamanllami canga. Ashtahuangarin pai juyanaca, tucui causaipajmi canga. Tutaca, huacana tiajpipash, tutamandaca cushijuimi shamunga.

⁶Ñuca ali causajushpaca: “Pipash na cuyuchihuangachu” yajurcanimi.

⁷Ashtahuangarin Mandaj Dioslla, can juyashpallami ñucataca jatun urcutashna, pipash na cuyuchi ushanallata rurahuarcangui. Cambaj ñavita pacajpica musparijurcanimi.

⁸Mandaj Dioslla, candaca caparishpa mañajushallami. Jatun Diostami, cutin cutin mañajushalla.

⁹Ñuca huañujpi, pambana utujuman urai rishpaca, ¿imapajshi ali canga? ¿Ñutu alpaca, canda alicachingachu? ¿Can na llullaj cajtapash villangachu?

¹⁰Mandaj Dioslla, ñuca mañashcata uyashpa, ñucata llaquihuayari. Mandaj Dioslla, ñucata ayudaj cahuayari.

¹¹Ñuca huacajushcataca, cushijushpa bailanamanmi tigrachihuarcangui. Cañamu churajunatapash surcuchishpami, cushijui churajunata churachihuarcangui.

¹²Ñucata punchayachijlla. Shinamandami candaca candajushalla, na upalla quedashachu. Ñucata Mandaj Taita Dioslla, tucui causaipi candaca alicachijushallami.