Read Imbabura Highland Quichua Psalms 31 Bible Online

Psalms 31 - Imbabura Highland Quichua bible

Psalms 31

¹Candajcunata mandaj candachijuchun, David rurashca Salmomi. Mandaj Dioslla, canda yariashpami causajurcani. Ñuca pandachi tucujuchunga, ima horapash ama saquihuaichu. Imatapash cashcatapacha rurashpa cacharichihuayari.

²Aliguta uyashpa, uchalla cacharichihuayari. Ñuca shinlli, jatun Rumishna capairi. Ñuca quishpirina shinlli torreshna capairi.

³Canmi, ñucapaca jatun Rumishna, shinlli jatun huasishna capangui. Cambaj shutimandami ñucataca, cambaj ñambi cuidashpa pushahuangui.

⁴Ñuca urmachun, pacalla churashca linllimandaca llujchihuayari. Canmi, ñuca pacajuna capangui.

⁵Ñuca espiritutaca, cambaj maquipimi mingapani. Na llullaj Mandaj Taita Dioslla, canmi ñucataca quishpichihuarcangui.

⁶Napash imata rurai ushaj, yanga dioscunata shuyajcunataca millanayachinimi. Ashtahuangarin ñucaca, Mandaj Diostami shuyajurcani.

⁷Ñuca llaquilla cajta can ricushcamandami, can llaquipi ninanda cushijujusha. Ñuca ninan llaquihuan cai horascunami, ñuca almataca rijsihuarcangui.

⁸Ñucataca, chai fiñajpaj maquipica, na churahuarcanguichu. Pipash na fiñachina pushtupimi shayachihuarcangui.

⁹Mandaj Dioslla, ninan llaquipimari cani, ñucataca llaquihuayari. Cai llaquihuanga ñuca ñavipash, ñuca almapash, cuerpopash tucurishcamari.

¹⁰Ñuca causaica, nanaihuanmi tucurishpa catijun. Aij nijuna ñuca huatacunapash, tucurishpami catijun. Jatun nalicunata ñuca rurashcamandami, ñuca ushaicunapash tucurishpa catijun. Ñuca tullucunapash tucurishcami.

¹¹Ñucata tucui fiñajcunapaca, asishpa ricunami cani. Ñuca ladolla causajcunapaca, ashtahuan asinami cani. Ñuca rijsishcacunapaca, manllarinayaimi cani. Ñucata canllapi ricushpaca, pacajungapajmi calpanajun.

¹²Ñucaca, paicunapaj shungupica, huañushcashnami cungai tucushcami. Faquirishca vasoshnami tucushcani.

¹³Taucacuna nalicachinajujtami uyani. Maita purijpipash, manllaimi japihuan. Tandanajushpa ñucata fiñashpa parlanajushpaca, causaita quichungapajpashmi yarinajun.

¹⁴Ashtahuangarin ñucaca, canda yariashpami causajuni, Mandaj Dioslla. Ñucaca: “Canmi, ñuca Taita Dios cangui” nijunimi.

¹⁵Ñuca causajui huatacunaca, cambaj maquipimi. Ñucata fiñajcunapaj maquimanda, ñucata catiriashpa llaquichij runacunamandapash cacharichihuayari.

¹⁶Canda servij ñucataca, cambaj ñavihuan punchayachihuayari. Can llaquij cashcamandaca quishpichihuayari.

¹⁷Mandaj Dioslla, canda mañashcamandaca, ñuca pingai tucuchunga ama saquihuaichu. Canda na manllajcunaca, pingai tucuchunlla Seolpica, upacuna cachunlla.

¹⁸Llullaj shimicunaca, upaman tigrachun. Imatapash cashcatapacha rurajtaca, shinlli shimicunahuanmi riman. Jariyashpa yangapi churashpami riman.

¹⁹¡Cambaj juyaica jatunmari! Chaitaca, canda manllajcunamanmi alichishcangui. Huañuna aichayu runacunapaj ñaupajpimi, chai juyaitaca canda shuyajcunaman ricuchishcangui.

²⁰Ñucata llujchingapaj runacuna pacalla jatarijpipash, cambaj ñaupajpimi pacalla pushtupi churahuangui. Fiñanajuipi churaj jallumandapash, jatun carpa ucupimi churahuangui.

²¹Mandaj Diosca, alicachi tucushca cachun. Paica, muyundi jatun pircahuan pueblopica, ñucata llaquishpami ninan juyaillacunata rurarca.

²²Ñucaca, manllaihuan musparishpami: “Cambaj ñaupajmandaca, anchuchi tucushcamari cani” yajurcani. Ashtahuangarin ninanda canda caparishpa mañajujtaca uyahuarcanguimi.

²³Mandaj Diospajlla causaj tucui cangunaca, paita juyaichiyari. Paita cazujcunatami, Mandaj Diosca huacaichin. Ashtahuangarin jariyashpa imatapash rurajcunamanmi, ashtaca llaquicunata cun.

²⁴Mandaj Diosta tucui shuyajcunaca, shinlli tucuichi. Cangunapaj shungupipash, cushijuita japichi.