Read Imbabura Highland Quichua Psalms 32 Bible Online

Psalms 32 - Imbabura Highland Quichua bible

Psalms 32

¹Yachachingapaj David rurashca Salmomi. Diosta na cazushpa, juchata rurashcatapash quilpanshna Dios cungajpica, maijan cashpapash ninandami cushijun.

²Ima nalimandapash, Mandaj Dios na juchachijpi causaj runaca, ninandami cushijun. Paipaj shungupipash, umachina yuyaica na tianllu.

³Ñuca juchata Diosman na villajpimi, ñuca tullucunaca rucuyarca. Tucui punllami, aij nijurcanilla.

⁴Punllandi, tutandimi cambaj maquica ashtahuan ashtahuan llaquichihuarca. Verdella jihuashna cashpapash, rupai punllacunapi chaquishca jihuashnami tucurcani. Selah

⁵Ñuca juchataca canmanmi villarcani. Ima nalita rurashcatapash na pacarcanichu. Ñucaca cashnami nircani: “Canda na cazushcacunataca, Mandaj Dios canmanllatami villasha” nircanimi. Canga, ñuca nalita rurashca juchataca cungahuarcanguimi. Selah

⁶Chaimandami, cambajlla causajcunaca, canda tarina punllacunapica tucuicuna mañanajunga. Jatun yacucuna jundanshna shamushpapash, paicunataca napacha japingachu.

⁷Canga, ñuca pacajuna cashpami, ima llaquimandapash huacaichihuangui. Llaquipi cajta llujchishcamanda candajcunatami, ñuca muyundipica churapangui. Selah

⁸Ñucami canda yachachishpa, can purina ñandapash ricuchisha. Candami, ñuca ñavihuanga ricuriasha.

⁹Na entendij caballoshna, mulashnaca ama caichu. Chaicunataca huascahuan huatashpami, jirruta amulichishpa cazuchina. Na chashna rurajpica, na cambaj ladoman quimirinmanllu.

¹⁰Diosta na manllaj runapaca, ashtaca nanaicunami tianga. Ashtahuangarin Mandaj Diosta shuyajtaca, paipaj llaquinami muyujun.

¹¹Mandaj Diospi cushijuichi. Imatapash cashcatapacha rurajcunapash, ninanda cushijuichi. Alitalla shungupi tucui yarijcunapash, ninanda cushijushpa candaichi.