Read Imbabura Highland Quichua Psalms 33 Bible Online

Psalms 33 - Imbabura Highland Quichua bible

Psalms 33

¹Imatapash cashcatapacha rurajcunalla, Mandaj Diospi cushijuichiyari. Ima nalitapash na rurajcunapaca, paita alicachinaca juyaillagumari.

²Mandaj Diostaca, arpata tocashpa candaichiyari. Chunga cuerdata charij tocanata, salteriota tocashpa candaichiyari.

³Mushuj candanahuan candaichi. Ninanda cushijuna tonohuan, aliguta tocaichi.

⁴Mandaj Dios rimashca shimica, aligupachami. Tucui imatalla pai rurashcacunapash, pactachij cajtami ricuchijun.

⁵Mandaj Diosca, imatapash cashcatapacha ruranata, aliguta ricushpa mandanatami juyan. Cai pachaca, paipaj llaquinahuan jundami.

⁶Mandaj Dios rimajpillami, jahua pachaca rurarirca. Chaipi tucui ima tiajcunapash, paipaj shimihuan fucujpillami rurarirca.

⁷Paimi, mama cucha yacucunatapash, mundunanshna tandachin. Manllanayai ucu ucu yacucunatapash, paimi yacuta alichinata ruran.

⁸Mandaj Diostaca, tucui cai pachapi causajcuna manllachun. Tucui cai pachapi causajcuna paipaj ñaupajpi manllachun.

⁹Pai rimajpica, ima tiajcunapash rurarircallami. Pai mandajpimi, tucui imapash tiai callarirca.

¹⁰Mandaj Diosca, llactacunapi causajcuna yarinajushcataca yangapimi churan. Gentecuna imatalla rurangapaj parlarinajujtapash jarcanllami.

¹¹Mandaj Dios imatalla rurashami nishcapash, causaita causaicaman pactajungallami. Paipaj shungupi yarishcacunataca, tucui jipa miraicunapaj rurajunllami.

¹²Mandaj Dios paicunapaj Taita Dios cajpi causanajuj llactaca, ninandami cushijun. Paicunataca paipajllata cachunmi, paillata agllashca.

¹³Mandaj Diosca, jahua pachamandami ricujurca. Huañuna aichayu tucui runacunatami ricujurca.

¹⁴Pai causajuj pushtumandami, cai pachapi tucui causajcunataca ricujurca.

¹⁵Paimi, tucuicunapaj shungutaca rurarca. Chaimandami imatalla paicuna ruranajujtaca, aligutapacha ricuriajun.

¹⁶Jatun mandajca, na ashtaca soldadocunata charishcamandalla quishpiri ushanllu. Ninan shinlli runapash, pai shinlli cashcamandalla, pacajungapaj calpaitaca na ushanllu.

¹⁷Quishpiringapaj, caballota charishcapash yangami. Ninan ushaita charij caballo cashpapash, pitapash na cacharichi ushangachu.

¹⁸Ricuichi, Mandaj Diosca paipaj ñavihuanmi paita manllajcunatapash, pai llaquinata shuyajcunatapash ricujun.

¹⁹Huañunamanda paicunapaj almata cacharichingapaj, yarjai punllacunapipash causaita cungapajmi chashna ricujun.

²⁰Ñucanchi almaca, Mandaj Diostami shuyan. Paica ñucanchita ayudaj, ñucanchi jarcarina escudoshnami.

²¹Chaimandami ñucanchi shunguca, paipi cushijunga. Jucha illaj paipaj shutigutami, yariashpa causanajurcanchi.

²²Mandaj Dioslla, imashna ñucanchi canda shuyashcashnallata llaquihuayari.