Read Imbabura Highland Quichua Psalms 34 Bible Online

Psalms 34 - Imbabura Highland Quichua bible

Psalms 34

¹Abimelec shuti runapaj ñaupajpi locoshna tucujpimi, Davidtaca llujchishpa cacharca. Chaimanda rishpa David rurashca Salmomi. Mandaj Diostaca, tucui punllacunapimi alicachijushalla. Ñuca shimihuanga, paitaca alicachijushallami.

²Mandaj Dioshuanmi, ñuca almaca cushijunga. Ali shungucunami, paita uyashpaca cushijunajunga.

³Mandaj Diostaca, ñucahuan jatunyachishunchiyari. Paipaj shutitaca, shujllashnalla tucushpa jatumbi churachishunchiyari.

⁴Mandaj Diostami mascajurcani. Paimi, ñuca mañajujta uyahuarca. Ñuca tucui imatalla manllajushcamandapash cacharichihuarcami.

⁵Diosta chapariajcunaca, punchayachi tucunajurca. Paicunaca, na pingaichi tucunajurcachu.

⁶Imagutapash na charij cai runagu caparijujpica, Mandaj Diosca uyahuarcami. Ñuca tucui llaquicunamandami cacharichihuarca.

⁷Mandaj Diosta manllajcunataca, paipaj angelmi muyundipi cuidashpa mitsajun.

⁸Mandaj Dios ali cajtaca, ricushpa yachaichiyari. Paitalla yariashpa causaj runaca, ninandami cushijun.

⁹Mandaj Diospajlla causanajuj cangunaca, paita manllaichiyari. Paita manllajcunapaca, imagupash na illanllu.

¹⁰Maltun leongunaca, micunata na tarishpa yarjaimi purinajun. Ashtahuangarin Mandaj Diosta mascajcunaca, ima alipash na illajmi causanajunga.

¹¹Huahuacuna, ñucata uyangapaj shamuichi. Mandaj Diosta imashna manllanatami yachachisha.

¹²¿Maijan runata alicunata ricungapaj munashpa, unai punllacunata causangapaj munan?

¹³Can chashna causanata munashpaca, cambaj jalluhuan nalita rimanataca, alichirishpa causangui. Cambaj shimihuan umachinatapash jarcaringui.

¹⁴Nalita ruranamandaca anchurishpa, alitalla rurangui. Casilla ali causaita mascashpa, chaitalla catingui.

¹⁵Mandaj Diosca, imatapash cashcatapacha rurajcunatami ricuriajun. Paicuna caparishpa mañanajujtaca, aligutapachami uyariajun.

¹⁶Mandaj Diosca, nalita rurajcunatami ninanda fiñashpa llaquichin. Paicunataca, pipash ama ashtahuan yarichun, cai pachamanda anchuchingapajmi, chashna llaquichin.

¹⁷Imatapash cashcatapacha rurajcuna caparishpa mañanajujpica, Mandaj Diosca uyanmi. Tucui ninan llaquicunamandapashmi, paicunataca cacharichin.

¹⁸Mandaj Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin.

¹⁹Imatapash cashcatapacha rurajtaca, ashtaca llaquicunami japin. Ashtahuangarin tucui chaicunamandaca, Mandaj Diosmi cacharichinga.

²⁰Paimi, paipaj tucuilla tullucunatapash cuidan. Chai tullucunamandaca, shujllapash na faquiringachu.

²¹Nalita rurajtaca, nalita rurashcallatami huañuchinga. Imatapash cashcatapacha rurajta millanayachij runacunaca, ninanda llaquichi tucunapachami canga.

²²Mandaj Diosmi, paita servijcunapaj almataca quishpichin. Paita yariashpa causajcunaca, napacha llaquichi tucungachu.