Read Imbabura Highland Quichua Psalms 35 Bible Online

Psalms 35 - Imbabura Highland Quichua bible

Psalms 35

¹David rurashca Salmomi. Mandaj Dioslla, ñucata fiñashpa rimajcunahuan chimbapura shayaripairi. Ñucahuan macanajujcunahuan macanajupairi.

²Jarcarina jatun escudotapash, uchilla escudotapash japishpa, ñucata ayudangapaj jataripairi.

³Ñucata catiriashpa llaquichijcunataca, cambaj lanzata japishpa tuparipairi. Ñuca almataca: “Ñucami, canda quishpichij cani” nipairi.

⁴Ñucata huañuchingapaj munajcunaca, pingai tucushpa muspachi tucushca cachun. Ñucata nalita rurachingapaj munajcunaca, pingai tucushpa huashaman tigrachi tucushca cachun.

⁵Huaira apanalla jupashna cachun, Mandaj Diospaj angelpash llaquichingapaj catiriajuchunlla.

⁶Paicunapaj ñanga yana yanapash, lluchashpa urmanallapash cachun. Mandaj Diospaj angelpash, catiriashpa llaquichijuchunlla.

⁷Ima nalitapash na rurajpitami, utujupi linllita pacalla ñucaman churanajurca. Yangamandami, ñucaman utujuta ruranajurca.

⁸Paicunataca na yachajta, llaqui japishpami ali canman. Paicuna pacalla churashca linllillata japishpaca, alimi canman. Chai linllipica, llaquita apangapaj urmachun.

⁹Chashna rurajpica ñuca almaca, Mandaj Dioshuanmi cushijunga. Pai quishpichijpimi cushijusha.

¹⁰Tucui ñuca tullucunapashmi, cashna ninajunga: “Mandaj Dioslla, ¿pita canshnaca tiangayari? Canga, llaquichi tucujtaca, paita yali ashtahuan shinlli runa llaquichijujmanda cacharichijmi cangui. Imagutapash na charij, imagupash illajcunata quichuj runapaj maquimanda quishpichijmi cangui” nijushami.

¹¹Llullashpa juchachij, nalita ruraj runacuna jatarishpami, ñuca na yachashcata tapuchinajuhuan.

¹²Paicunaca, ñuca almata llaquichingapajmi, alita rurashcamandaca, llaquita tigrachinajuhuan.

¹³Shina cajpipash, paicuna ungushca cajpica, ñucaca cañamutami churajurcani. Tucui almahuan ninanda llaquirishpami, micuitapash na micushpa ñuca shungupi mañajurcanilla.

¹⁴Ñuca cumbamandashna, ñuca huauquimandashnami purijurca. Mama huañujpi yanata churajushpa, purinshnami yanata churajushpa, pingai tucujurcani.

¹⁵Ashtahuangarin paicunaca, llaquita ñuca apajujpica, cushijushpami tandanajurca. Ñucata fiñaj, na rijsishca gentecunashnami tandanajurca. Imamanda chashna rurajtapash na yacharcanichu. Chai runacunami, ñucataca fitishpa tucuchinshna, na samashpa llaquichihuarca.

¹⁶Uyanayaita llullashpa parlajcunashna, na cazushpa asijcunashna umachijcunashnami, quirutapash canirishpa ñucataca fiñahuarca.

¹⁷Jatun Dioslla, ¿ima horascamanda caitaca ricujugringuilla? Ñuca causaita tucuchigrinajuj leongunapaj shimimanda, ñuca almata quishpichihuayari.

¹⁸Candaca, jatun tandanajuipimi villajusha. Candaca, tauca gentecunapaj chaupipimi alicachijusha.

¹⁹Yangamanda ñucata fiñajcunaca, ama cushijunajuchun. Yangamanda na ricunayachij runacunaca, ama ñavita capitsinajuchun.

²⁰Paicunaca, casilla ali causaimandaca, na parlanllu. Llactapi na jariyashpa causajcunata, fiñashpa umachishpa villanatami yarinajun.

²¹Shimi cacharishcata rimashpami, ñucataca: “¡Jajai, ñucanchi ñavihuambachamari ricushcanchi!” ninajun.

²²Mandaj Dioslla, canllata ricushcanguimi, ama upalla ricuhuaichu. Jatun Dioslla, ñucamanda ama caruyapaichu.

²³Ñuca Taita Dioslla, ñucata Mandajlla, ñucaman imatapash cashcatapacha rurangapaj, rijcharishpa shayaripairi. Imamanda llaquichinajujtapash, mitsashpa ayudahuayari.

²⁴Ñucata Mandaj Taita Dioslla. Canga, imatapash cashcatapacha imashna rurajunshnallata ricushpa mitsahuayari. Ñucata ricushpa cushijunajuchunga, ama saquipaichu.

²⁵Paicunapaj shungupica: “¡Jajai, ñucanchica chashna tucuchunmi munarcanchi, paitaca langashcanchimi!” ninajuchunga, ama saquipaichu.

²⁶Ñucata llaqui japijpi cushijujcunaca, pingai tucushpa, muspachi tucushca cachun. Ñucata fiñashpa jariyajcunaca, pinganayai churajunata churajunshna muspachi tucushca cachun.

²⁷Ashtahuangarin chashnallata rurana cashcamanda ñucata mitsajcunaca cushijunajuchun, candanajuchun. Paicunaca, tucui causaipi cashna ninajuchun: “Mandaj Diosca, jatunyachi tucushca cachun. Paica, paita servijtaca aliguta casilla causachunmi munan” ninajuchun.

²⁸Ñuca jalluhuanga, imatapash cashcatapacha can rurashcatami villajusha. Tucui punllacunami, candaca alicachijusha.