Read Imbabura Highland Quichua Psalms 36 Bible Online

Psalms 36 - Imbabura Highland Quichua bible

Psalms 36

¹Candajcunata mandaj candachijuchun, Mandaj Diosta servij David rurashca Salmomi. Diosta na manllaj runa nalita rurashcami, ñuca shungupica cashna nijuhuan: “Cai runaca, Diospaj ñaupajpica napacha Taita Diosta manllashpa causanllu” nijuhuanmi.

²Chaimandami paipaj ricuipica, pai nalita rurashcataca na taringachu, na millanayachingachu yashpa, uyanayaita parlarijun.

³Paipaj shimihuanga nalitalla, umachishpa quichunatallami parlajun. Paica ali yuyaitapash, alita ruranatapash saquishcami.

⁴Paica, camapi sirijushpapash, nalita ruranatallami yarijun. Nalitallami rurashpa causan. Nalita ruranataca, na millanayachinllu.

⁵Mandaj Dioslla, can llaquinaca, jahua pachacamanmi chayajun. Can tucuita pactachij cashcapash, fuyucamanmi chayajun.

⁶Imatapash cashcatapacha can rurashcapash, can Taita Diospaj urcucunashnami. Can llaquichinacunaca, manllanayai ucu ucu yacucunashnami. Mandaj Dioslla, gentecunatapash, animalcunatapash, canmi cuidashpa charijungui.

⁷¡Taita Dioslla, can llaquij canaca juyaillagumari! Chaimandami, huañuna aichayu gentecunaca, llandujuj cambaj alas ucupi pacajunajun.

⁸Cambaj huasipi juyailla micunatami, na munajta micunajunga. Canga, cambaj juyailla ashtaca yacutapashmi ufiachingui.

⁹Causaita cuj yacu llujshijujca, canhuanmi. Cambaj micha punchayachijpimi, michata ricushun.

¹⁰Can llaquishcataca, canda rijsijcunaman mirachipairi. Imatapash cashcatapacha can rurashcatapash, alitalla shungupi yarijcunaman mirachipairi.

¹¹Jariyashcacuna ñucata llaquichij shamuchunga, ama saquihuanguichu. Canda na manllajcunapaj maquihuan ñucata llaquichinajuchunga, ama saquihuanguichu.

¹²Chaipimi, nalita ruraj runacunaca urmarca. Paicunaca, ñami urmachi tucushca, cutinga na jatari ushangachu.