Read Imbabura Highland Quichua Psalms 37 Bible Online

Psalms 37 - Imbabura Highland Quichua bible

Psalms 37

¹David rurashca Salmomi. Nali runacunamandaca, ama fiñarichu. Nalita rurajcuna ruranajujtaca, na munashpa ricunachu cangui.

²Paicunaca, jihuashnami ñapash anchuchi tucunajunga. Verde jihuashnami chaquinajunga.

³Mandaj Diosta yariashpa, alita rurajuilla. Shina rurashpami, llactapica causangui. Na llullaj shimita yachajushpami cushijungui.

⁴Shinallata Mandaj Dioshuanlla cushijui. Paimi, cambaj shungupi imatalla mañashcacunataca caranga.

⁵Cambaj causaitaca, Mandaj Diosman mingai. Paitalla yariashpa causai. Paica, imata cashpapash rurangallami.

⁶Imatapash cashcatapacha can rurajushcataca, michashnami ricuchijunga. Japina cashcata can japinapash, chaupi punllashna punchallami canga.

⁷Mandaj Diospaj ñaupajpica, upalla cailla. Paitaca shuyajuilla. Nalicunata ruraj runapaj causaipi tucui ali llujshijta ricushpapash, ama ninanda munashpa fiñarijuichu.

⁸Ninanda fiñarinata saquishpa, chai fiñarinataca shitai. Nalita ruranataca, ama ninanda munajuichu.

⁹Nalicunaca tucuchi tucungami. Ashtahuangarin Mandaj Diosta shuyajcunami, llactataca japinga.

¹⁰Cunanmanda asha punlla jipaca, nali runaca illangami. Pai tiajushca pushtuta can ricujpica, chaipica illangami.

¹¹Ashtahuangarin na jariyajcunami, llactataca japinga. Casilla ali causaihuanmi, ninanda cushijunajunga.

¹²Diosta na manllaj runaca, imatapash cashcatapacha ruraj runata llaquichinatallami yariajun. Quirutapash canirishpami fiñan.

¹³Jatun Diosca, chai runataca paipaj punlla chayamujujta ricushpaca asingami.

¹⁴Diosta na manllajcunaca, imagutapash na charij, imagupash illaj runaguta urmachingapajmi, espadatapash surcunajun, arcotapash chutanajun. Imatapash aligutalla rurajcunata huañuchingapajmi, chashna ruranajun.

¹⁵Espadaca, paipaj shungupillatami yaicunga. Paipaj arcopash, faquishcami canga.

¹⁶Juchata rurajcuna ashtacatapacha charinshna charinapaj randica, imatapash cashcatapacha ruraj runapaca, ashatalla charinami ashtahuan ali.

¹⁷Diosta na manllajcunapaj rigracunaca, faquirishcami canga. Ashtahuangarin imatapash cashcatapacha rurajcunata shinllichijca, Mandaj Diosmi.

¹⁸Ima nalitapash na rurajcunapaj causanajui punllacunataca, Mandaj Diosca rijsinmi. Paicuna japina cashcapash, causaita causaipajmi canga.

¹⁹Llaqui punllacunapipash, na pingai tucunajungachu. Yarjai punllacunapipash, na munajtami micunajunga.

²⁰Ashtahuangarin Diosta na manllajcunaca tucuringami. Mandaj Diosta fiñajcunaca, jari llamacunapaj virashnami yacuyashpa tucurinajunga. Cushnishnami chinganga.

²¹Diosta na manllaj runaca, imata mañashpapash na tigrachinllu. Ashtahuangarin imatapash cashcatapacha ruraj runaca, llaquishpami imagutapash caran.

²²Pai bendiciashcacunami, llactataca japinga. Pai ninanda nalicachishcacunaca, tucuchi tucungami.

²³Mandaj Diosmi, runa imashna causanataca ricuchijun. Paimi, chai causaitaca alicachishpa ricujun.

²⁴Maijan runa urmashpapash, na chaipi quedangachu. Paitaca, Mandaj Diosmi maquimanda charijun.

²⁵Ñucapash huambrami carcani, ñami rucuyani. Imatapash cashcatapacha ruraj runa jichui tucushcataca, na ricushcanichu. Paipaj huahuacuna micunata mañanajujtapash, na ricushcanichu.

²⁶Paica, ima horapash llaquishpa mañachinllami. Paipaj miraicunapash, bendiciai tucungami.

²⁷Nalimanda anchurishpa, alitalla rurai. Shina rurashpaca, causaitami causangui.

²⁸Mandaj Diosca, alita ruraj runatami juyan. Paipajlla causajcunatapash, na jichushpa saquinllu. Paicunataca, causaita causaicamanmi huacaichinga. Ashtahuangarin paita na manllajcunapaj miraicunaca tucuchi tucungami.

²⁹Imatapash cashcatapacha rurajcunami, llactataca japinga. Chai llactapica, causaitami causanajunga.

³⁰Imatapash cashcatapacha ruraj runaca, ali yachajushca shimicunatami riman. Paipaj jalluca, imatapash cashcatapachami riman.

³¹Paipaj shungupica, paipaj Taita Dios mandashcata yariashpami causan. Chaimandami paipaj chaquica, na lluchanga.

³²Diosta na manllaj runaca, imatapash cashcatapacha ruraj runata huañuchingapaj munashpami, pacalla chapajun.

³³Mandaj Diosca, na chai runapaj maquipi saquingachu. Juezcuna juchachinajujpipash, ninandapacha llaquichi tucuchunga na saquingachu.

³⁴Mandaj Diosta shuyashpa, pai mandashcata cazui. Paica llactata carangapajmi, candaca jatumbi churanga. Juchata ruraj runacunata tucuchishca jipapimi, chaitaca ricungui.

³⁵Diosta na manllaj runataca, ninanda jatun tucujtami ricurcani. Verde verde laurel quiru viñajujtashnami ricurcani.

³⁶Shina cashpapash paica chingarcallami, paica ñapashmi chingarca. Paitaca mascashpapash, na tarircanichu.

³⁷Ima nalitapash na rurajtaca yaripairi. Imatapash cashcatapacha rurajtaca ricupairi. Casilla aliguta causaj runapaca, jipaman cushijunami tianga.

³⁸Ashtahuangarin na cazujcunaca tandachishpami, tucuilla tucuchi tucunga. Diosta na manllajcunapaj miraicunaca tucuringami.

³⁹Ashtahuangarin imatapash cashcatapacha rurajcunapaj quishpirinaca, Mandaj Diospimi. Paimi, ninan llaqui huatacunapica shinlli torreshna.

⁴⁰Mandaj Diosmi, paicunataca ayudashpa huacaichinga. Paita na manllajcunapaj maquimanda cacharichishpami quishpichinga. Paita shuyashcamandami, chashna quishpichinga.