Read Imbabura Highland Quichua Psalms 38 Bible Online

Psalms 38 - Imbabura Highland Quichua bible

Psalms 38

¹Dios yarijuchun nishpa, David rurashca Salmomi. Mandaj Dioslla, ama ñapash fiñarishpa rimahuaichu. Ama ninanda fiñarishpa llaquichihuaichu.

²Cambaj flechacunami, ñuca jahuapi urmamurca. Cambaj maquipash ñuca jahuapimi llapimujushca.

³Can fiñarishcamandami, ñuca cuerpoca tucuilla ungushca. Ñuca juchamandami, ñuca tullucaman casilla ali causaitaca na chari ushani.

⁴Jatun nalita ñuca rurashcacunami, ñuca umapi shinllita llapimujun. Llasha quipishnami, ñuca jahuapi shinllita llapimujun.

⁵Locoshna nalita rurashcamandami, carachahuan ismushpa ashnajuni.

⁶Ninanda pingai tucushpami, urai cumurishcalla purijuni. Yana churajunata churajushcashnami, punllandi purijuni.

⁷Ñuca huashatapash tucuillata rupajujpi ñuca cuerpopash tucuilla ungushca cajpimi, chashna purijuni.

⁸Ushai illajmi cani, ninanda ñutushcashnami cani. Ñuca shungu nanaihuanmari aij nijuni.

⁹Jatun Dioslla, tucui imatalla ñuca munashcapash, cambaj ñaupajpimi. Jatunda ñuca llaquirijushcapash, canmandaca na pacallachu.

¹⁰Ñuca shunguca, ninanda llaquichi tucushcamari. Ñuca ushaipash, ña illanmi. Ñuca ricujpi ñavipash amsayanmi.

¹¹Ñuca cumbacunapash, ñucahuan purijcunapash, ñucapaj ung:uita ricushpami caruyanajun. Ñuca ladolla causajcunapashmi caruyashca.

¹²Ñucata huañuchingapaj mascanajujcunaca, lazunshna urmachinatami yarinajun. Ñucata llaquichingapaj munajcunapash, nalicunatallami parlanajun. Umachishpa quichunatallami, punllandi yarinajun.

¹³Ashtahuangarin ñucaca, rinri na uyanshnami, imatapash na uyani. Na rimai ushanshnami, imatapash na rimani.

¹⁴Shina cashpami, na uyaj runashna cani. Ñuca shimihuanga, imata tigrachitapash na ushanichu.

¹⁵Mandaj Dioslla, candallami shuyajuni. Ñucata Mandaj Taita Dioslla, canmi tigrachipangui.

¹⁶Ñucaca cashnami nircani: “Ñuca chaqui lluchajpipash, ama cushijunajuchun, ñucata ama jariyanajuchun” nircanimi.

¹⁷Ashtahuangarin ña urmanallapachami cani. Nanaipash, ñucataca catipi catipimi japihuan.

¹⁸Shinamandami, nalita ñuca rurashcataca canman villasha. Juchata ñuca rurashcamandaca, ninandami llaquirisha.

¹⁹Ñucata fiñajcunaca, ali yachashca, ninan shinllicunami. Ñucata yangamanda millanayachij runacunaca, ashtahuanmi mirashca.

²⁰Alita rurajpi nalita tigrachijcunaca, ñuca alita rurashpa catishcamandami fiñahuan.

²¹Mandaj Dioslla, ama jichuhuaichu. Ñuca Taita Dioslla, ama ñucamanda caruyapaichu.

²²Ñucata quishpichij Jatun Dioslla, uchalla ayudahuayari.