Read Imbabura Highland Quichua Psalms 4 Bible Online

Psalms 4 - Imbabura Highland Quichua bible

Psalms 4

¹Cuerdacunahuan tocanacunata tocashpa, candajcunata mandaj candachijuchun, David rurashca Salmomi. Imatapash cashcatapacha ñucaman ruraj Taita Dioslla, ñuca caparijpica tigrachihuayari. Ñuca llaquihuan cajpica, canmi cushichihuarcangui. Ñucata llaquihuayari, ñuca mañashcatapash uyahuayari.

²Huañuna aichayu runacuna, ¿ima horascamanda ñucata alicachishcataca, nalicachinaman tigrachigringuichi? ¿Ima horascamanda yangacunatalla juyashpa, llullanatalla mascagringuichi?

³Shujcunata juyaj runataca, paipajlla cachun Mandaj Diosca, agllashcata yachaichiyari. Paita ñuca caparishpa mañajpica, Mandaj Diosca uyangallami.

⁴Paita manllashpa, juchata na ruranachu canguichi. Camapi cashpapash, tucui shunguhuan aligutapacha yarishpa upallaichi.

⁵Imatapash cashcatapacha rurashpami, animalcunata carashpa huañuchina canguichi. Mandaj Diostaca, yariashpami causana canguichi.

⁶Ashtacacunami: “¿Pita aliguta rurashpa ñucanchiman ricuchingayari?” ninajun. Mandaj Dioslla, michashna cambaj ñavigutaca, ñucanchiman ricuchiyari.

⁷Ashtaca granota, llullu vinota charishpa paicuna cushijushcatapash ashtahuan yalimi ñuca shungupica, cushijuita cuhuarcangui.

⁸Casilla, ima manllaipash illajmi siririsha, chashnallatami puñusha. Can Mandaj Diosllami, ñucataca imatapash na manllashpa causachun cuidahuangui.