Read Imbabura Highland Quichua Psalms 40 Bible Online

Psalms 40 - Imbabura Highland Quichua bible

Psalms 40

¹Candajcunata mandaj candachijuchun, David rurashca Salmomi. Mandaj Diostaca, na fiñarishpa shuyajurcanillami. Ñucapajman cumurimushpami, ñuca caparijujtapash uyahuarca.

²Ñucataca, yacuta llujchingapaj allashca, na llujshi ushanalla jatun utujumanda, yaculla turumandami llujchihuarca. Chaimanda llujchishpaca, jatun rumi jahuapi shayachishpami, shinlli purichun shayachihuarca.

³Chai jipaca, ñucanchi Taita Diosta alicachishpa, mushuj candanatami ñuca shimipi churarca. Chaita ashtacacuna ricushpami manllarinajunga. Shinallata Mandaj Diostapashmi, yariashpa causanajunga.

⁴Mandaj Diosta yariashpa causaj runaca, ninandami cushijun. Jariyashcacunatapash, llullata catishpa pandarijcunatapash, paica na ricujunllu.

⁵Ñucata Mandaj Taita Dioslla, ashtahuanmi jatun manllarinacunata rurashpa mirachishcangui. Ñucanchitapash ashtahuanmi yarijungui. Chaicunaca, cambaj ñaupajpica na cuentai ushanallami. Chaicunata ñuca villashpa parlajpica, na cuentai ushanallami.

⁶Animalcunata canman carashpa huañuchishcapash, ashtahuan imacunata carashcapash, candaca na cushichinllu. Ñuca rinritaca, uyachunmi canga pascahuashcangui. Animalta cushpa tucuillata rupachijuchumbash, juchamanda cuchumbash na mañashcanguichu.

⁷Chaimandami cashna nircani: “Ricui, ñucami shamujuni. Can escribichishpa pillushca libropimi, ñucamandaca villajun.

⁸Ñuca Taita Dioslla, cambaj munaita rurashpami cushijushcani. Can mandashcatapash, ñuca shungupimi charijuni” nijurcanimi.

⁹Imatapash cashcatapacha ruranataca, jatun tandanajuipimi villajurcani. Ricui, ñuca shimihuanga na upalla carcanichu. Chaitaca, Mandaj Dios canllata yachapanguimi.

¹⁰Imatapash cashcatapacha can rurashcataca, na ñuca shungu ucupilla charircanichu. Can tucuita pactachij cajta, quishpichij cajtaca villajurcanimi. Can llaquij cajta, na llullaj cajtaca, na pacashpami, jatun tandanajuipi villajurcani.

¹¹Mandaj Dioslla, ñucata llaquinataca ama saquihuaichu. Can llaquij canapash, na llullaj canapash, tucui causaipi huacaichihuachun.

¹²Ñucataca, na cuentai ushanalla llaquicunami muyuhuashca. Jatun nalicunata ñuca rurashcallatami japihuashca. Vichai ricuitapash na ushanichu. Llaquicunaca, ñuca uma ajchacunatapash yalimi mirashca. Ñuca shungupash, ña huañugrijunmi.

¹³Mandaj Dioslla, quishpichingapaj shamupairi. Mandaj Dioslla, ñucata ayudangapaca ucha shamupairi.

¹⁴Ñuca causaita tucuchingapaj mascajcunaca, tucuicunallata pingai tucushpa, pandachi tucushca cachun. Llaquita ñuca apachun munajcunaca, huashaman tigrashpa pingai tucuchun.

¹⁵Ñucata: “¡Jajai, jajai!” nishpa rimashpa pingaichishcamandaca, tucuchi tucushca cachun.

¹⁶Canda mascajcunaca, tucuicuna canhuan ninanda cushijuchun. Can quishpichijta juyajcunaca, causaita causaicaman: “Mandaj Diosca jatunyachi tucushca cachun” ninajuchun.

¹⁷Ñucaca llaquilla cajpipash, imagupash illaj cajpipash, Mandaj Diosmi ñucataca yarihuanga. Canmi, ñucata ayudaj, ñuca llaquimanda cacharichij capangui. Ñuca Taita Dioslla, ama unayapaichu.