Read Imbabura Highland Quichua Psalms 41 Bible Online

Psalms 41 - Imbabura Highland Quichua bible

Psalms 41

¹Candajcunata mandaj candachijuchun, David rurashca Salmomi. Imagutapash na charij runaguta yarij runaca, ninandami cushijun. Llaqui punllapica, Mandaj Diosmi paitaca quishpichinga.

²Mandaj Diosmi, huacaichishpa causaitapash caranga. Cai pachapipash, ninanda cushijushpami causajunga. Paita fiñajcuna ima munashcata rurachumbash, na saquinguichu.

³Nanaihuan camapi sirijujpipash, Mandaj Diosmi ayudanga. Nanaihuan sirijujpipash, paipaj camataca, ñutullagutami rurangui.

⁴Ñucaca, cashnami nircani: “Mandaj Dioslla, llaquihuayari. Ñuca almaguta alichihuayari. Canda fiñashpamari, juchata rurashcani” nircanimi.

⁵Ñucata fiñajcunaca ñucata nalicachishpami, cashna nishpa tapurinajun: “¿Ima horata huañushpa, paipaj shutipash chingangayari?” ninajunmi.

⁶Ñucata ricungapaj shamushpapash, llullashpami parlanajun. Paicunapaj shungupica, paicunapajllatami jatun nalita mirachinajun. Canllaman llujshishpaca, ñuca imashna cajtami parlanajun.

⁷Ñucata millanayachij runacunaca, tucuilla tandanajushpa fiñashpami, huashalla parlanajun. Ñucataca llaquichingapaj yarishpami, cashna ninajun:

⁸“Paitaca, manllanayai nali ung:uimi japirca. Chai ung:uihuan camapi shitarishcamandaca, na cutin jatari ushangachu” ninajunmi.

⁹Ñuca ali cumba, ñucata yariashpa causaj, ñuca micunatallata micuj runapashmi, ñucata fiñashpa jaitahuarca.

¹⁰Ashtahuangarin Mandaj Dioslla, ñucata llaquishpa jatarichihuayari. Shina jatarichijpimi, paicunaman cuna cashcata cusha.

¹¹Ñucata fiñajcuna shayarinajuchun na saquijpimi, canda ñuca cushichishcataca yachasha.

¹²Ñucataca, ima pandatapash ama rurachunmi, jarcashpa charijuhuashcangui. Causaita causaipajmi, cambaj ñaupajpi churahuashcangui.

¹³Israelcunata Mandaj Taita Diosca, causaita causaicaman alicachi tucushca cachun. Shina cachun. Shina cachun.