Read Imbabura Highland Quichua Psalms 42 Bible Online

Psalms 42 - Imbabura Highland Quichua bible

Psalms 42

¹Candajcunata mandaj candachijuchun, yachachingapaj Coré shuti runapaj miraicuna rurashca Salmomi. Taita Dioslla, imashnami tarugaca ninanda rijuj yacu manñapi huacashpa purijun, chashnallatami ñuca almapash candaca caparijun.

²Ñuca almaca, ninanda yacunayachinshnami, Taita Diostaca mascan, causajuj Taita Diostami mascan. ¿Ima horata Taita Diospaj ñaupajpi ricuringapaj shamushayari?

³Punllapash, tutapash viquitallami micunshna causajurcani. Tucui punllacunami: “¿Cambaj Taita Diosca, maipitayari?” ninajuhuan.

⁴Ñucaca, caicunatami yarishpa, tucui almahuan ninanda llaquirini. Ashtaca gentecunata pushashpami, Diospaj huasiman chayajun carcani. Ninan cushijuihuan alicachishpa caparinajujcunapaj chaupipimi, fiestata ruraj gentecunahuan rijun carcani.

⁵Ñuca almalla, ¿imashpata shaijushpa ñuca shungupash musparijunguiyari? Taita Diostalla shuyai. Paitaca alicachisharami, ñucata quishpichij, ñuca Taita Diosmi.

⁶Ñuca Taita Dioslla, ñuca almaca ninanda shaijushcamari. Chaimandami candaca, Jordán yacu lado llactamanda, hermonita nishcacuna causanajuj llactamanda, Mizar urcumanda yarijusha.

⁷Cambaj fajcha yacucuna huacanajujpimi, manllanayai ucu ucu yacucunaca, caishuj yacucunata cayajun. Cambaj tucui yacucuna jahuata jatarijujca, ñuca jahuatami yalinajun.

⁸Ashtahuangarin punllapica, pai llaquij cajtami Mandaj Diosca ricuchinga. Tutaca, canman candanami ñucahuan canga. Ñucaman causaita cuj Taita Diosta mañanapashmi, ñucahuan canga.

⁹Taita Diostaca, cashnami nisha: “Jatun Rumishna ñuca Dioslla, ¿imashpata ñucata cungahuangui? ¿Imashpata ñucata fiñaj runa llaquichishcamandaca, ninanda llaquirishpa purijusha?” nishami.

¹⁰Ñuca tullucunata maijambash chugrichinshnami, ñucata na ricunayachij runacunaca: “¿Cambaj Taita Diosca maipitayari?” nishpa, punllandi rimashpa pingaichinajuhuan.

¹¹Ñuca almalla, ¿imashpata shaijushpa, ñuca shungupipash musparijunguiyari? Taita Diostalla shuyayari. Paitaca alicachisharami, ñucata quishpichij, ñuca Taita Diosmi.