Read Imbabura Highland Quichua Psalms 44 Bible Online

Psalms 44 - Imbabura Highland Quichua bible

Psalms 44

¹Candajcunata mandaj candachijuchun, yachachingapaj Coré shuti runapaj miraicuna rurashca Salmomi. Taita Dioslla, ñucanchi ñaupa taitacuna causanajushca punda huatacunapi, can imatalla rurashcataca, ñucanchi ñaupa taitacunami villarca. Chaitaca, ñucanchi rinrihuambachami uyarcanchi.

²Canga, shuj llactapi causajcunata cambaj maquihuan llujchishpa cachashpami, ñucanchi ñaupa taitacunataca tarpunshna caipi churarcangui. Gentecunataca llaquichishpami, llujchishpa cacharcangui.

³Cai llactataca, na paicunapaj espadahuan macanajushpa japinajurcachu. Paicunapaj rigrapash, na quishpichircachu. Ashtahuangarin cambaj ali lado maquihuan, cambaj rigrahuan, punchapamba cambaj ñavihuanmi ayudarcangui. Paicunahuan cushijushpami, chashna ayudarcangui.

⁴Taita Dioslla, canga ñucata jatun mandajmi capangui. Jacobopaj miraicunataca quishpichipairi.

⁵Canhuanllami, ñucanchita fiñajcunataca caiman chaiman cachashun. Cambaj shutipimi, ñucanchita na ricunayachij runacunataca sarushun.

⁶Ñuca arcotaca, na yariashpa causajushachu. Ñuca espadapash, na quishpichihuangachu.

⁷Canmi, ñucanchita fiñajcunamandaca huacaichishcangui. Ñucanchita millanayachij runacunatapashmi pingaichishcangui.

⁸Taita Dioshuanmi, tucui causaipi cushijushun. Cambaj shutitaca, causaita causaicamanmi alicachinajushun. Selah

⁹Ashtahuangarin ñucanchita jichushpami pingaichishpa saquircangui. Chashna rurashpami, ñucanchi soldadocunahuanga na llujshingui.

¹⁰Fiñajcunapaj ñaupajmandapashmi, ñucanchitaca manllashpa tigrachun saquircangui. Chaimandami ñucanchita millanayachij runacunaca, ñucanchi imatalla charishcata quichushpa apanajun.

¹¹Ñucanchitaca, huañuchina pushtuman llamata apachun cunshnami cungui. Ñucanchitaca, shuj llacta puracunapica, caita chaitami cacharcangui.

¹²Can agllashcacunataca, yanga jatushpami, ima culquitallapash na mañarcangui.

¹³Ñucanchitaca, ladollapi causajcuna rimashpa pingaichinajuchunmi churangui. Ñucanchi muyundipi causajcuna na cazushpa asinajuchun, asishpa ricunajuchunmi churangui.

¹⁴Shuj llacta puracunapica, ñucanchimanda yarichij shimicunata parlachunmi churarcangui. Ñucanchita ricujcunaca, tucuicunami umata muyuchishpa ricunajun.

¹⁵Ñuca pingai tucushcapash, punllandimi ñuca ñaupajpi ricurin. Ninanda musparishpami, ñavita quilpashcashna cani.

¹⁶Ñucata nalicachishpa rimashcamanda, ñuca alicachi tucushcata huaglichishcamandami chashna cani. Ñucata fiñajcunapaj, ñucata llaquichijcunapaj jahuami chashna cani.

¹⁷Cai tucui llaquicuna ñucanchipajman shamujpipash, candaca na cungashpami causanchi. Canhuan ari ninajushcatapash, na cungashpami causanchi.

¹⁸Ñucanchi shungupash, canmandaca na anchurircachu. Cambaj ñanmandapash, na anchurishpami causarcanchi.

¹⁹Shina cajpipash, chacal nishca animalcunatashnami llaquichircangui. Huañui japinalla llanduhuanmi, ñucanchitaca quilparcangui.

²⁰Ñucanchi Taita Diospaj shutita cungajpi, na cashpaca shuj diosmanra maquita vichai churajpica,

²¹¿nachu Taita Diosca llaquipi churanman carca? Paica, shungupi pacalla yarijujtapash rijsinmi.

²²Shina cajpipash canmandami, punllandi huañuchi tucunajunchi. Huañuchi tucuna llamacuna cuentai tucushcashnami causanajunchi.

²³Jatun Dioslla, rijcharipairi, ¿imashpata puñujupangui? Rijcharipairi, ñucanchimandaca ama causaita causaicaman caruyapaichu.

²⁴¿Imashpata cambaj ñavitaca, shujman churapangui? ¿Imashpata llaquinayaita causanajujta, llaquichi tucushpa causanajujta ricujushpapash, ñucanchitaca cungapangui?

²⁵Ñucanchi almaca, cai tucui llaquicunahuanga shaijushpa, ñutu alpapi urmashcashnami. Ñucanchi cuerpopash, alpapi tiarishpa quedashcashnami.

²⁶Ñucanchita ayudangapaj jataripairi. Can llaquij cashcamandaca, ñucanchita quishpichihuayari.