Read Imbabura Highland Quichua Psalms 45 Bible Online

Psalms 45 - Imbabura Highland Quichua bible

Psalms 45

¹Lirio sisacuna nishpa candana tonopi, candajcunata mandaj candachijuchun, yachachingapaj Coré shuti runapaj miraicuna rurashca Salmomi. Juyarinamanda candanami. Ñuca shungumandaca, juyailla shimicunami llujshijun. Jatun mandajmanmi candagrijuni. Ñuca jalluca, ñapash escribij runapaj plumashnami.

²Huañuna aichayu runa purapica, ashtahuan yali juyaillagumi capangui. Cambaj shimimandaca, uyanayai shimicunami llujshijurca. Chaimandami, candaca tucui causaipaj, Taita Diosca bendiciashca.

³Ninan shinlli runalla, cambaj espadata cambaj changapi huatariyari. Cambaj punchapambahuambash, mandana ushaihuambash chumbiliyari.

⁴Can punchapamba cashcamandaca, tucuipi ali llujshipairi. Na llullaj shimipi, na jariyashca canapi, imatapash cashcatapacha ruranapi, caballopishna tiaripairi. Cambaj ali lado maquimi, imatapash jatun manllarinacunata rurashpa ricuchinga.

⁵Cambaj flechacunaca, filo filomi. Chaicunahuanmi, shuj llacta gentecunaca cambaj chaqui ucupi urmanajunga. Chaicunallatami, jatun mandajta fiñajcunapaj shungupica yaicunga.

⁶Taita Dioslla, can mandashpa tiarinaca, na tucurina causaita causaipajmi. Imatapash cashcatapacha rurana varami, llactata mandana cambaj vara canga.

⁷Canga, imatapash cashcatapacha ruranata juyashpami, nalitaca millanayachishcangui. Chaimandami cambaj Taita Diosca, cushichina aceiteta talishpa javishpa, cambaj cumbacunatapash yali candaca cushichirca. Cambaj Taita Diosmi, chashna rurarca.

⁸Tucuilla cambaj churajunacunami, mirra nishca, áloe nishca, casia nishca jambicunata javishca, mishquillagu ashnajun. Marfilta churashpa rurashca, mandashpa tiajuna huasimandapachami, candaca ninanda cushichinajun.

⁹Cambaj huasipi alicachi tucushpa tianajuj puracunapica, jatun mandajcunapaj ushicunami tianajun. Jatun mandaj huarmica, cambaj ali lado maquimanmi, Ofir llactamanda orota churajushca tiajun.

¹⁰Ricui ñuca huahualla, cambaj rinrita mañachishpa uyahuai. Cambaj llacta puracunata, cambaj taitapaj huasi ucu puratapash cungailla.

¹¹Jatun mandajca, can juyaillagu cajtami munanga. Paimanmi cumurina cangui, paimi canda mandaj.

¹²Tiro shuti pueblopi causajcunaca, caranacunahuanmi shamunga. Ninan charij gente puracunapipash, can alita rurachunmi canda mañangapaj shamunajunga.

¹³Jatun mandajpaj ushiguca punchapambami, pai causana ucupica tiajun. Paipaj churajunaca, oro puchahuan ahuashcami.

¹⁴Bordashca churajunacunahuanmi, jatun mandajpajman apai tucunga. Jarihuan nara tacarishca cuitsacunami, paita catinajunga. Paipaj cumba cuitsacunapashmi, cambajman apamui tucunajunga.

¹⁵Ninan cushijuihuanmi apamui tucunajunga. Shina apamujpimi, jatun mandaj mandashpa tiajuj huasiman yaicunajunga.

¹⁶Cangunapaj taitacunapaj randica, cangunapaj churicunami canga. Paicunatami, tucui cai pachapi mandanajuchun churangui.

¹⁷Cambaj shutita yarinataca, tucuilla jipa miraicunapash, tucui causaicaman yachachunmi churasha. Chaimandami llactacunapi causajcunaca, na tucuri causaita causaicaman alicachinajunga.