Read Imbabura Highland Quichua Psalms 46 Bible Online

Psalms 46 - Imbabura Highland Quichua bible

Psalms 46

¹Candajcunata mandajca, jamzillata candachijuchun, Coré shuti runapaj miraicuna rurashca Salmomi. Taita Diosmi ñucanchita ayudaj, ñucanchipaj shinlli torreshna. Ñucanchita llaquicuna japijpipash, ñapash ayudajmi.

²Chaimandami alpa mama cuyupipash, na manllashun. Urcucuna mama cucha chaupiman yalijpipash, na manllashunllu.

³Mama cucha yacucuna manllanayaita huacashpa cuyurinajujpi, urcucuna chujchujpipash, na manllashunllu. Selah

⁴Jatun yacumanda ninanda rijuj yacucunami, Taita Diospaj pueblotaca cushichijun. Chai puebloca, jahua pachapi causajuj Diospajlla huasimi.

⁵Taita Diosmi, chai pueblo chaupipica tiajun. Chai pueblotaca, na cuyuchi ushanallachu canga. Taita Diosmi, tutamanda punllayajujpica ayudanga.

⁶Shuj llactacunapi causajcuna caparinajujpimi, mandajcunaca chujchunajurca. Dios caparijpimi, alpaca yacuyarca.

⁷Tucuita Mandaj Diosmi ñucanchihuan. Jacobopaj Taita Diosca, ñucanchita pacajmi. Selah

⁸Mandaj Dios imatalla rurashcata ricuj shamuichi. Paica cai pachataca, llaquinayaitami tucuchishca.

⁹Paica, cai pacha tucui manñacunacaman jatun macanajuicuna tiajtapash saquichinllami. Arcota, lanzataca faquishpa fitishpami, carretacunatapash ninapi rupachin.

¹⁰“Casilla caichi, ñucataca Taita Dios cajta rijsihuaichiyari. Shuj llactacunapi causajcunapaj chaupipica, jatumbimi churai tucusha. Cai pachapica, jatunyachi tucushami”.

¹¹Tucuita Mandaj Diosmi ñucanchihuan. Jacobopaj Taita Diosca, ñucanchita pacajmi.