Read Imbabura Highland Quichua Psalms 48 Bible Online

Psalms 48 - Imbabura Highland Quichua bible

Psalms 48

¹Coré shuti runapaj miraicuna rurashca candana Salmomi. Mandaj Diosca jatumbachami, ninandapacha alicachi tucunatami charin. Ñucanchi Taita Diospaj pueblopi tiaj paipajlla urcupimi, jatunyachi tucuna.

²Juyailla llactaca, chai llactapi causajcuna cushijunami. Jahua ladoman tiajuj Sion shuti urcuca, Jatun Mandajpaj pueblomi.

³Pai mandashpa tiajuna huasicunapica, imamandapash pacaj Taita Dios cajtami rijsin.

⁴Ricui, cai pachapi jatun mandajcunaca, tandanajushpami tucuilla yalimunajurca.

⁵Chashna shamunajujta paicuna ricushpaca, manllarishpa musparishpami, ucha pacajugrinajurca.

⁶Chaipica, manllashpa chujchunami japirca. Huahuata ungugrijuj huarmitashnami, nanai japirca.

⁷Tarsis pueblomanda jatun barcocunataca, indi llujshimuj ladomanda huairahuanmi faquingui.

⁸Tucuita Mandaj Diospaj pueblopi ñucanchi Taita Diospaj pueblopica, imashnami uyashcanchi, chashnallatami ricushcanchi. Chai pueblotaca causaita causaicamanmi, Taita Diosca shinllitapacha charijunga. Selah

⁹Taita Dioslla, cambaj huasi ucupimi, can llaquij cajtaca yarinajunchi.

¹⁰Taita Dioslla, cambaj shuti imashna cashcashnallatami, cai pacha manñacunacaman candaca alicachinajun. Cambaj ali lado maquipica, imatapash cashcatapacha ruranalla jundami.

¹¹Sion urcupash, Judá llactapi causajcunapashmi, can ricushpa alipacha rurashcamandaca, ninanda cushijunga.

¹²Sion pueblo muyundita purigrichi, mashna torrecuna tiashcata cuentaichi.

¹³Canllaman pircacunatapash, aliguta ricuichi. Mandashpa tiajuna huasicunatapash ricuichi. Chaicunataca, cangunapaj jipa miraicunaman villangapajmi ricuna canguichi.

¹⁴Taita Diosca, causaita causaipaj na tucurij ñucanchi Taita Diosmi. Paimi, ñucanchitaca huañushca jipapash cuidanga.