Read Imbabura Highland Quichua Psalms 49 Bible Online

Psalms 49 - Imbabura Highland Quichua bible

Psalms 49

¹Candajcunata mandaj candachijuchun, Coré shuti runapaj miraicuna rurashca Salmomi. Tucui gentecuna, caita uyaichi. Tucui cai pachapi causajcuna, uyaichi.

²Yangacuna cashpa, alicachi tucushcacuna cashpa, charij cashpa, imagutapash na charij cashpapash, tucuillacuna uyaichi.

³Ñuca shimihuanga, ali yachaitami rimasha. Ñuca shunguhuanga, ali yuyaitami yarisha.

⁴Ali yuyaita cujuj shimitami, aliguta uyasha. Na yachai ushanallatami, arpata tocashpa villasha.

⁵Ñucata fiñajcuna, jatun nalita rurashpa muyundi llaquichinajui punllapipash, ¿imamandata manllashayari?

⁶Paicunaca, imata charishcacunata yariashpallami causan. Ninandapacha charishcacunahuanmi, jariyashpa parlanajun.

⁷Chaicunahuanga, imahuanllapash shuj huauquita quishpichitaca, napacha ushangachu. Pai quishpiringapajpash, Taita Diosman cuitaca na ushangachu.

⁸(Causaita quishpichingapaca, ashtacapacha valishcami. Chaitaca, imata cushpapash ima horapash na ushangachu).

⁹Causaita causaicaman causangapajpash, ima horapash na ismugringapajpash, imata cuitapash na ushanllu.

¹⁰Ashtahuangarin alipacha yachajushcacunapash, huañujtami ricunga. Paicunapash shinlli shungu runashnallata, juizu illaj runashnallata huañujtami ricunga. Paicunapaj charishcacunataca, shujcunamanmi saquin.

¹¹Paicunapaj shungu ucupica, paicunapaj huasicunaca, causaita causaicamanmi canga yashpami causanajun. Chai huasi ucucunapash, mirai miraicunapajmi canga yashpami causanajun. Paicunapaj alpacunatapash, paicunapaj shutihuanmi saquinajun.

¹²Ashtahuangarin runaca, na alicachi tucushcalla causajungachu. Paicunapash, huañushpa chingaj animalcunashnallatami.

¹³Paicunapaj causaipipash, yuyai illanshnami causanajun. Shina cajpipash paicunapaj miraicunaca, chai yuyai illajcuna rimashcahuanmi cushijunajun. Selah

¹⁴Paicunataca, llamacunatashnami Seolman pushanga. Chaipica huañuimi michijunga. Aligutalla rurajcunami, paicunataca tutamandata mandanajunga. Paicuna juyailla cashcapash tucuringami, Seolmi paicuna causana huasi canga.

¹⁵Ashtahuangarin ñuca causaitaca, Taita Diosmi Seolpaj ushaimandaca quishpichihuanga. Paimi ñucataca pushahuanga. Selah

¹⁶Maijambash ninanda charijyashpa, paipaj huasipi ninan cushijunacunata juyailla jundachijpipash, ama manllarichu.

¹⁷Ima hora pai huañushpaca, imatapash na apangachu. Imata juyailla charishcacunapash, na paita catishpa urai ringachu.

¹⁸Paica, causajushpallami paipaj almataca cushijuilla nijun. Ninanda charishpami, alicachi tucujun.

¹⁹Shina cashpapash, paipaj ñaupa taitacunahuanmi tandanajugringa. Chai jipaca, ima horapash na michata ricungachu.

²⁰Alicachi tucushpa causaj runa cashpapash, na yuyaita japij cashpaca, huañushpa chingaj animalcunashnallatami.