Read Imbabura Highland Quichua Psalms 5 Bible Online

Psalms 5 - Imbabura Highland Quichua bible

Psalms 5

¹Gaitacunata tocashpa, candajcunata mandaj candachijuchun, David rurashca Salmomi. Mandaj Dioslla, ñuca mañajushca shimicunata uyahuayari. Ñuca aij nishpa huacajujtaca ricuhuayari.

²Ñucata Jatun Mandajlla, ñuca Taita Dioslla, ñuca caparijujtaca aligutapacha uyahuangui. Ñucaca, candallami mañasha.

³Mandaj Dioslla, ñuca mañajujtaca tutamandatami uyapangui. Tutamandatami, cambaj ñaupajpi mañashpa shuyajupasha.

⁴Canga, nalicunahuan cushijuj Taita Diosca na canguichu. Nalicunaca, cambaj ladopica na causangachu.

⁵Juizu illajcunaca, na cambaj ñaupajpi shayari ushangachu. Nalita rurajcunataca, tucuicunatami na ricunayachingui.

⁶Llullashpa parlajcunataca tucuchinguimi. Huañuchishpa, umachishpa causajcunatapash, Mandaj Diosca na ricunayachingachu.

⁷Ashtahuangarin ñucaca, can ninanda llaquij cashcamandami, cambaj huasiman yaicusha. Canda manllashpami, cambajlla huasiman ricushpa, cungurishpa mañasha.

⁸Mandaj Dioslla, ñucata fiñajcuna ñucata ricuriashpa ama juchachinajuchunga, imatapash cashcatapacha ruranapi pushahuayari. Cambaj ali ñangunapi churashpa pushahuayari.

⁹Paicunapaj shimihuanga, yanga nij tucushpallami parlanajun. Paicunapaj shungupica, nalicunalla jundami. Paicunapaj cungaca, huañushcata pambashca utujuta pascashcashnami. Paicunapaj jalluhuanga, uyanaitami llullashpa parlanajun.

¹⁰Taita Dioslla, paicunataca llaquichipairi. Paicuna nali yuyaita cunajushcapillata urmachun saquipailla. Ninandapacha canda na cazushcamandaca anchuchipairi. Paicunallatami canda jariyanajurca.

¹¹Ashtahuangarin canda yariashpa causajcunaca, tucuicuna cushijunajuchun. Paicunata mitsashpa can ayudashcamandaca, ninanda cushijushpa paicunapaj tucui causaipi caparinajuchun. Cambaj shutita juyajcunaca, canhuan cushijunajuchun.

¹²Can Mandaj Diosllami, imatapash cashcatapacha rurajtaca bendiciapangui. Jarcarina escudohuan muyundipi jarcajunshnami, cambaj juyaihuan paitaca jarcangui.