Read Imbabura Highland Quichua Psalms 50 Bible Online

Psalms 50 - Imbabura Highland Quichua bible

Psalms 50

¹Asaf shuti runa rurashca Salmomi. Taita Diosca, dioscunapaj Mandaj Diosmi. Paimi, cai pachapi causajcunataca, indi llujshimuj ladomanda, indi huashajuj ladocaman causajcunata tandanajuchun cayashpa rimashca.

²Tucuita yali juyailla Sion urcumandami, Taita Diosca punchayachimushca.

³Ñucanchi Taita Dios shamushpaca, na upalla shamungachu. Paipaj ñaupajpica, ninami tucuchinga. Paitaca, ninan shinlli tamiahuan, huaira muyushcami canga.

⁴Jahua pachataca, jahuamandami cayanga. Cai pachataca, pai agllashcacuna imata rurashcata ricungapajmi cayanga.

⁵Paica cashnami ninga: “Ñucapajlla causajcuna, ñucapaj cangapaj animalta carashpa huañuchishpa ari nishcacuna, tandanajumuichi” ningami.

⁶Imatapash cashcatapacha can rurashcataca, jahua pachami villanga. Taita Dios Juez cajpimi, chashna villanga. Selah

⁷Ñuca agllashcacunalla, ali uyahuaichi, ñucami rimagrini. Israelcunalla, uyahuaichi. Ñucami, cangunata fiñashpa rimagrini: “Ñucami Taita Dios cani, cambaj Taita Diosmi cani.

⁸Animalcunata ñucaman carashpa huañuchishcamandaca, na jarcashpa rimagrinichu. Ñuca ñaupajpi animalta ñucaman cushpa, tucuillata rupachishcamandaca, na rimagrinichu.

⁹Cambaj huasimanda shicucunataca, na japishachu. Cambaj corralmanda, jari chivocunatapash na japishachu.

¹⁰Sachapi causaj tucuilla animalcunapash, lomacunapi causaj huaranga huaranga animalcunapash ñucapajmi.

¹¹Urcucunapi causaj alasyu tucui animalcunatapash rijsinimi. Pambacunapi causaj tucuilla animalcunapash ñucapajmi.

¹²Ñucaca, yarjaihuan cashpapash, na canman villaimanllu. Cai pachaca, tucui imalla chaipi tiajcunandimi ñucapaj.

¹³¿Ñucaca, huagra aichata micunichu? ¿Na cashpaca, jari chivocunapaj yahuarta ufianichu?

¹⁴Taita Diostaca, animalta carashpa huañuchinshna alicachingui. Imata carashapacha nishcataca, jahua pachapi causajuj Diosman cungui.

¹⁵Llaqui punllapica, ñucata mañahuanguilla. Chai llaquimandaca cacharichishallami. Cambash ñucataca alicachihuanguimi” nishpami rimagrini.

¹⁶Ashtahuangarin nalita rurajtaca, Taita Diosca cashnami nirca: “Canga, ñuca mandashcacunamandaca, ¿imata ninatata charingui? Ñucahuan ari nishcatapash, cambaj shimihuanga imatallapash na ninachu cangui.

¹⁷Canga, ali tucuchun rimashcatapash millanayachinguimi. Ñuca rimashca shimicunatapash, huashamanmi churangui.

¹⁸Shuhua runata ricushpaca, paihuanmi calpan carcangui. Cazarashca jahua shuj huarmicunahuan causajcunahuanmi purin carcangui.

¹⁹Cambaj shimihuanga, llaquipillami churan carcangui. Cambaj jallupash, umachinatallami yachan carca.

²⁰Tiarishpaca, cambaj huauquitallatami, huasha parlan carcangui. Cambaj mamapaj churitallatami, juchachishpa pingaichin carcangui.

²¹Chashnacunata rurajujpipash ñucaca, upalla saquircanillami. Ñucatapash, canshnallapachami canga yarcanguimi. Ashtahuangarin candaca jarcashpa rimashpami, chashna rurashcacunataca, cambaj ñaupajpillata ricuchisha.

²²Taita Diosta cungashpa causaj cangunaca, cunanga caita yarichi, pactarallapash cangunata ñutujpi, pipash na quishpichij tianman.

²³Animalta ñucaman carashpa huañuchinshna ñucata alicachijmi, alipi churahuanga. Paipaj causaita alichijmanmi, Taita Dios ñuca quishpichinata ricuchisha” nircami.