Read Imbabura Highland Quichua Psalms 51 Bible Online

Psalms 51 - Imbabura Highland Quichua bible

Psalms 51

¹Betsabé shuti huarmipi David chayashca jipami, Dios ima nishcata villaj Nataán runaca, Davidpajman shamurca. Candajcunata mandaj candachijuchun, David rurashca Salmomi. Taita Dioslla, can imashna llaquin cashcashnallata, ñucata llaquihuayari. Imashna ninanda llaquin cashcashnallata, ñuca na cazushpa jariyashcata anchuchipairi.

²Jatun nalita rurashcataca, ashtahuan ashtahuan maillahuayari. Ñuca juchata fichahuayari.

³Canda na cazushcamandaca, ninandami llaquirini. Ñuca juchaca yarichijuhuanllamari.

⁴Canda ninanda fiñachishpamari, juchata rurajushcani. Cambaj ñaupajpimi, chai jatun nalitaca rurajushcani. Canga, juchachina cajpillatami juchachihuangui. Ñuca juchamandallata llaquichishcataca, imata nitapash na ushapanichu.

⁵Ricui, ñucaca mamapaj vijsapillatami, na ali cashcani. Ñuca mamaca, juchandillatami vijsayu tucuhuashca.

⁶Ricui, canga na llullajtami ninanda juyangui. Chaitami ñucamambash, shungupilla ali yachaita yachachihuarcangui.

⁷Ñuca juchataca, hisopo nishca malquihuan anchuchihuayari. Shina anchuchijpimi, ima mapapash illaj tucusha. Maillahuayari, can maillajpimi, rasutapash yali yuraj yuraj tucusha.

⁸Ninan cushijunata uyachihuayari. Shina rurajpimi, tullucaman can llaquichishca cajpipash, cutin cushijusha.

⁹Ñuca juchacunataca, ama ricuhuaichu. Nalita rurashcataca, tucuilla fichahuayari.

¹⁰Taita Dioslla, ñucapica ima mapapash illaj shunguta rurahuayari. Aligutalla ruraj espirituta, ñucapica cutin churahuayari.

¹¹Cambaj ñaupajmandaca, ama anchuchihuaichu. Cambaj jucha illaj Espiritutapash, ñucamandaca ama anchuchihuaichu.

¹²Can quishpichijpi cushijushcataca, cutinllata cuhuayari. Cambaj ali Espirituhuan charihuangui.

¹³Shina rurajpimi, canda na cazujcunataca, canda cazushpa causanata yachachisha. Juchata rurajcunaca, cambajman tigrarinajungami.

¹⁴Taita Dioslla, pitapash huañuchinamandaca jarcahuayari. Ñucata quishpichij Taita Dioslla, imatapash cashcatapacha can rurashcatami, ñuca jalluhuanga candasha.

¹⁵Jatun Dioslla, ñuca shimita pascahuayari. Shina rurajpimi candaca, shujcunapaj ñaupajpi alicachisha.

¹⁶Canga, animalta carashpa ñuca huañuchijuchumbash, animalta canman cushpa tucuillata rupachijuchumbash na munanguichu.

¹⁷Shungu faquirishpa llaquirinaca, Taita Diosman animalta carashpa huañuchishcashnami. Taita Dioslla, ninanda llaquirishca ali shungutaca, na yangapi churanguichu.

¹⁸Sion pueblopica, cambaj juyaihuan alita rurapairi. Jerusalén muyundipica, pircacunata shayachipairi.

¹⁹Chashna rurajpimi, imatapash cashcatapacha rurashpa, animalcunata canman carashpa huañuchishcapash, candaca cushichinga. Animalta canman cushpa tucuillata rupachishcapash, na cashpaca imatapash canman cushpa tucuillata rupachishcapashmi, candaca cushichinga. Shina cajpimi cambaj altarpica, shicucunata canman carashpa rupachinajunga.