Read Imbabura Highland Quichua Psalms 52 Bible Online

Psalms 52 - Imbabura Highland Quichua bible

Psalms 52

¹Cai Salmotaca, Edom llactamanda Doeg shuti runa: “Davidca, Ahimelec shuti runapaj huasiman shamurcami” nishpa, Saulman villangapaj shamushca jipa yachachingapaj, David rurashca Salmomi. Ninan ushaita charij runalla, ¿imashpata jatun nalita rurashpara jariyangui? Taita Diospaj juyaica, na tucurinllu.

²Cambaj jalluca, llaquipi churanatallami rimajun. Umachingapaca, navajata filo filota rurashcashnami.

³Alita juyangapaj randica, nalitarami ashtahuan juyarcangui. Na llullaj cangapaj randica, llulla canatarami ashtahuan juyarcangui. Selah

⁴Llaquichij shimicunatalla rimanatami juyangui, umachijlla jallutami charingui.

⁵Shinamandami Taita Diosca, causaita causaicaman candaca tucuchinga. Candaca llaquinayaita tucuchishpami, can causajuj huasimandaca llujchinga. Cai pachapi causanajuj puramandaca, sapimanda llujchinshnami candaca anchuchinga. Selah

⁶Imatapash cashcatapacha rurajcuna chai runata ricushpaca, manllarishpami cashna nishpa asinajunga:

⁷“Ricui, runallatami Taita Diostaca paipaj shinlli torreshna cachunga, na munarca. Ashtahuangarin pai ninanda charishcacunatalla yariashpami, jatun nalicunatalla rurashpa causajurca” ninajungami.

⁸Ashtahuangarin ñucaca, Taita Diospaj huasipica, verde olivos yurashnami cani. Taita Dios llaquij cajtaca, na tucurij causaita causaicamanmi yariajuni.

⁹Chashna rurashcamandami, tucui causaipi candaca alicachijushalla. Cambajlla causajcunapaj ñaupajpica, ali cashcamandami, cambaj shutipilla shuyajusha.