Read Imbabura Highland Quichua Psalms 53 Bible Online

Psalms 53 - Imbabura Highland Quichua bible

Psalms 53

¹Llaquilla tonopi, candajcunata mandaj candachijuchun, yachachingapaj David rurashca Salmomi. Shinlli shungu runaca, paipaj shungupica: “Taita Diosca na tianllu” yajunmi. Huaglicuna tucushpami, millanayai jatun nalicunatalla ruranajurca. Alita ruraj runaca, pillapash na tianllu.

²Taita Diosca, jahua pachamandami huañuna aichayu runacunataca ricujurca. Taita Diosta mascaj, ali yuyaita charij runaca, pillapash tiambashchari yashpami ricujurca.

³Tucuicunami huashaman tigrashpa, huaglicuna tucunajurca. Alita ruraj runaca, pipash na tianllu, shujllapash na tianllu.

⁴Jatun nalita rurajcunaca, tucuicunami na juizu japin. Ñuca llacta purataca, tandata micushpa langanshnami tucuchinajun. Paicunaca, Taita Diostaca na mañanllu.

⁵Paicunaca, imata manllanapash na tiajpitami, jatun manllaihuan chujchunajurca. Taita Diosmi, canda fiñashpa chaupipi churajcunapaj tullucunataca, caiman chaiman cacharca. Taita Dios paicunata jichujpimi, paicunataca pingaichircangui.

⁶¡Israelcunapaj quishpirinaca, Sion urcumanda llujshipashcanman! Pai agllashcacuna prezu apai tucushcamanda, Taita Dios tigrachimujpimi, Jacobopaj mirai israelcunaca, ninanda cushijunga.