Read Imbabura Highland Quichua Psalms 55 Bible Online

Psalms 55 - Imbabura Highland Quichua bible

Psalms 55

¹Cuerdacunahuan tocanacunata tocashpa, candajcunata mandaj candachijuchun, yachachingapaj David rurashca Salmomi. Taita Dioslla, ñuca mañajujta uyahuayari. Ñuca ninanda mañajujpica, ama pacajupaichu.

²Ñuca mañajujtaca, aligutapacha uyariashpa tigrachihuayari. Llaquilla cashpami, caparishpa mañajupani.

³Ñucata fiñaj runa ninanda caparijujpi, canda na manllaj runa ninanda llaquichijujpimi mañajupani. Ñucatami llaquipi churanajun, ninanda fiñarishpami catirianajuhuan.

⁴Ñuca ucu shungutaca nanajumbachami. Huañungashna manllaimi, ñucapajman shamuhuashca.

⁵Manllaihuan chujchunami, ñucapajman shamuhuashca. Ninan manllaimi ñucataca quilpahuashca.

⁶Chaimandami cashna yajurcani: “¡Palomapaj alastashna pipash cuhuashcanman! Shina cujpica, jahuata jatarishpa samagrimanllari.

⁷Carumambachami pacajushpa riman. Jichushca pambapimi causagriman. Selah

⁸Manllanayai huairahuan shinlli tamiamandaca, uchami pacajugriman” yajurcanimi.

⁹Jatun Dioslla, paicunataca tucuchipairi. Paicunapaj rimaitaca pandachipairi. Pueblopica, ninandapacha llaquichinajujta fiñanajushpa rimarinajujtami ricurcani.

¹⁰Punllapash tutapashmi, pueblo jatun pirca jahuacunata muyunajun. Chai pueblo chaupipica, jatun nalita ruranapash jatun llaquipashmi tian.

¹¹Jatun nalita ruranami, pueblo chaupipica tian. Plazacunapica, umachishpa quichunatapash, imashna umachinatapash na saquinllu.

¹²Ñucata fiñaj runaca, na rimashpa pingaichihuarcachu. Chai runa pingaichijpica, pingai tucuimanllami carcani. Ñucata millanayachij runaca, imata ningapajllapash na jatarircachu. Chai runamandaca pacajuimanllami carcani.

¹³Ashtahuangarin ñucapaj ali cumba, ñucahuan purij, ñuca familiashna cashpapash, canmi chashna rurangui.

¹⁴Pipash na yachanallacunataca, ishcandimi juyaillaguta parlarin carcanchi. Taita Diospaj huasipipash, cumba tucushpami purin carcanchi.

¹⁵Paicunataca, cungashcapi huañui japichun. Seolmambash, causaj urai rinajuchun. Paicuna causanajuj huasicunapi, paicunapaj chaupipica jatun nalicunalla tiashcamandami, chashna tucunga.

¹⁶Ñucamandaca, Taita Diostami caparisha. Mandaj Diosmi quishpichihuanga.

¹⁷Chishipash, tutamandapash, chaupi punllapashmi, caparishpa mañajusha. Ñuca mañajujtaca, paimi uyahuanga.

¹⁸Ñucata fiñashpa huañuchingapaj ashtacacuna shamunajujpipash, paimi casilla ali causaihuan quishpichihuanga.

¹⁹Ñaupa huatacunamandapacha causajujlla Taita Diosmi, ñucata uyashpa paicunataca llaquichinga. Paicunallata ali tucungapaj na munashpa, Taita Diostapash na manllashcamandami, chashna ruranga. Selah

²⁰Nalita ruraj runaca, paihuan casilla ali causajuj cumbacunatapash fiñashpa llaquichircallami. Paihuan ari nishcatapash, na pactachircachu.

²¹Paipaj shimihuan rimashcacunaca, leche viratapash yali llambullami. Ashtahuangarin paipaj shungupica, macanajunatallami yariajun. Aceitetapash yali llambulla shimicunatami parlan. Shina cashpapash macanajungapaj, espadata ña llujchishcashnami.

²²Llasha quipishna cambaj llaquitaca, Mandaj Diosman saquilla. Paica ayudangallami. Imatapash cashcatapacha rurajtaca, na tucui causaipi llaquita apajuchun saquingachu.

²³Ashtahuangarin Taita Dioslla, canga paicunataca chingaita chingana utujumanmi urai cachangui. Huañuchijcunapash, umachijcunapash, chaupi causaitallapash na causanajungachu. Ashtahuangarin ñucaca, canda yariashpami causasha.