Read Imbabura Highland Quichua Psalms 56 Bible Online

Psalms 56 - Imbabura Highland Quichua bible

Psalms 56

¹Carupi llaquilla, upalla purijuj palomagu nishca tonopi, candajcunata mandaj candachijuchun, David rurashca juyailla candanami. Cai candanataca, Gat shuti pueblopi filisteocuna japishpa huañuchishunmi ninajushca jipami rurashca. Taita Dioslla, ñucata llaquihuayari. Runacunaca micuhuangamari, punllandimari catiriashpa llaquichinajuhuan.

²Ñucata fiñajcunaca, tucui punllamari sarunajuhuan. Ñucata jariyashpa jatun tucushpa macanajungapaj shamujcunaca, ashtacacunamari.

³Paicunata ñuca manllajui punllapica, candallami yariani.

⁴Taita Diosta yariashpa causashpami, paipaj shimihuan rimashcata alicachini. Taita Diosta yariajllami causajuni. Runa imata ruranatapash, na manllashachu.

⁵Punllandimi, ñucataca nalicachishpa llaquichinajun. Paicunapaj yuyaipash, ñucata fiñashpa llaquichinatallami yarianajun.

⁶Tandanajushpa pacajushpami, ñuca maita rijtapash chaparianajun. Ñucata huañuchingapaj pacalla chapajcunashnami chaparianajun.

⁷Taita Dioslla, jatun nalita paicuna rurashcashnallata llaquichipairi. Gentecunataca, ninanda fiñarishpa tucuchipairi.

⁸Ñuca mashnacaman pacajushpa purijushcataca yachanguimi. Ñuca viquitaca, cara muchilapimi tandachishpa charijupangui. Chaicunataca, ¿nachu cambaj libropi escribishca?

⁹Canda ñuca mañajui punllapica, ñucata fiñajcunaca huashamanmi tigrachi tucunga. Chaita rurangapaca can Taita Diosca, ñucahuan cajtami yachani.

¹⁰Taita Diosta yariajlla causashpami, paipaj shimihuan rimashcata alicachisha. Mandaj Diosta yariashpa causashpami, paipaj shimihuan rimashcata alicachisha.

¹¹Taita Diostami yariashpa causajuni. Runa imata ruranatapash, na manllashachu.

¹²Taita Dioslla, canman imatalla rurasha nishcataca, pactachinami cani. Ñuca alicachishcatami canman cusha.

¹³Canmi ñuca almataca, huañunamanda cacharichircangui. Can Taita Diospaj ñaupajpi purichunmi, urmagrijujpipash charihuarcangui. Michapi causajcunahuan causachunmi, chashna rurahuarcangui.