Read Imbabura Highland Quichua Psalms 57 Bible Online

Psalms 57 - Imbabura Highland Quichua bible

Psalms 57

¹Ama tucuchihuaichu nishpa candana tonopi, candajcunata mandaj candachijuchun, David rurashca juyailla candanami. Cai candanataca, Saulmanda pacajushpa shuj utujupi causajushpami rurashca. Taita Dioslla, ñucata llaquihuayari, ñucata llaquihuayari. Tucui almahuanmi, candalla yariajurcani. Ninan llaquicuna yalingacamanmi, llandujuj cambaj alas ucupi pacajusha.

²Jahua pachapi causajuj Taita Diostami mañajupasha. Ñucaman alita ruraj Taita Diostami mañasha.

³Juchachishpa pingaichijcuna catiriashpa llaquichinamandaca, paimi jahua pachamanda cachamushpa quishpichihuanga. Taita Diosca na llullaj, paipaj juyaitami cachamunga. Selah

⁴Leongunapaj chaupipishnami causajuni. Ninata shimiman shitajuj, huañuna aichayu runacunapaj chaupipimi sirijuni. Paicunapaj quirucunaca lanzacunashna, flechacunashnami. Paicunapaj jallupash, filo filo espadashnami.

⁵Taita Dioslla, jahua pachapica jatunyachi tucushca capailla. Tucui cai pachapica, cambaj punchapamba ricurijuchun.

⁶Ñuca chaqui purinapica, linllitami churashca. Ñuca almataca, ninandami llaquichishca. Ñuca purina ñambica, jatun utujutami allashca. Chai utujupica, paicunallatami urmanajushca. Selah

⁷Taita Dioslla, ñuca shunguca canman candangapaj yariajunmi. Tucui shunguhuan yariashpami, Salmocunata rurashpa candasha.

⁸Ñuca almalla, rijchariyari. Arpapash, salteriopash, rijcharichiyari. Tutamandatami jatarisha.

⁹Jatun Dioslla, candaca gentecunapaj chaupipimi alicachijusha. Candaca, llactacunapaj chaupipimi candajusha.

¹⁰Can llaquinaca, jahua pachacaman jatumbachami. Can na llullaj canapash, fuyucamanmi.

¹¹Taita Dioslla, jahua pachapica jatunyachi tucushca capailla. Tucui cai pachapica, cambaj punchapamba ricurijuchun.