Read Imbabura Highland Quichua Psalms 58 Bible Online

Psalms 58 - Imbabura Highland Quichua bible

Psalms 58

¹Ama tucuchihuaichu nishpa candana tonopi, candajcunata mandaj candachijuchun, David rurashca juyailla candanami. Tandanajushcacunalla, ¿cangunapaj shimihuanga imatapash cashcatapachachu rimanguichi? Huañuna aichayu runacuna, ima llaqui tiajpipash, ¿aligutachu ricushpa alichinguichi?

²Ashtahuangarin cangunapaj shungupica, nalita ruranatallami yarinajunguichi. Cangunapaj maquihuan ninandapacha llaquichishpami, cai pachataca llashachinguichi.

³Diosta na manllajcunaca, mamapaj vijsapi cashpallatami, Diosmanda anchurinajurca. Huacharishca punllamandapacha llullashpa rimaj cashpami, pandashpa anchurinajurca.

⁴Culebrapaj venenotashnami, paicunaca charin. Rinri vichashca millai culebrashna, na uyajcunami.

⁵Rinri vichashca cashpami, muspachinata ali yachaj yumbu tocajpipash, na uyan.

⁶Taita Dioslla, paicunapaj ñaupa quirucunataca, paicunapaj shimipillata faquipairi. Mandaj Dioslla, maltun leongunapaj juchu quirucunatapash faquipairi.

⁷Paicunaca, urai rijuj yacushna caita chaita cachai tucuchun. Paicunapaj flechacunata cacharijpica, ñuturishca cachun.

⁸Paicunaca, churu yacuyanshna chingachun. Huañushcata ungushca huahuashna, inditaca ama ricuchun.

⁹Chaquishca cashacuna cangunapaj mangacunata nara cunujyachijpillatami Diosca, causaj cajpipash, ninanda fiñashca cajpipash, ninan huaira tamiahuan apanga.

¹⁰Imatapash cashcatapacha ruraj runaca, Dios llaquichijta ricushpami cushijunga. Paipaj chaquitapash, Diosta na manllaj runapaj yahuarpimi maillanga.

¹¹Chaipimi runaca, cashna nijunga: “Imatapash cashcatapacha ruraj runapaca, alita japina tiambachami. Cai pachapica, llaquichij Taita Dios tiambachami” nijungami.