Read Imbabura Highland Quichua Psalms 59 Bible Online

Psalms 59 - Imbabura Highland Quichua bible

Psalms 59

¹Ama tucuchihuaichu nishpa candana tonopi, candajcunata mandaj candachijuchun, David rurashca juyailla candanami. Cai candanataca, paita huañuchingapaj Saúl cachajpi, paipaj huasipi chapanajushca jipami rurashca. Ñuca Taita Dioslla, ñucata fiñajcunamanda cacharichihuayari. Ñucata llaquichingapaj jatarijcunamanda quishpichihuayari.

²Nalita rurajcunamanda cacharichihuayari. Huañuchij runacunamanda quishpichihuayari.

³Ricui, ashtahuangarin ñucata huañuchingapajmi pacalla chaparianajun. Ushaita charij runacunami, ñucata llaquichingapaj tandanajushca. Mandaj Dioslla, imapash nalita ñuca rurashcamanda, juchata ñuca rurashcamandaca, na canllu.

⁴Ñucataca, juchata na rurajpitami, catishpa calpamunajun. Ñucata tuparij shamungapaj jatarishpa ricuhuayari.

⁵Tucuita Mandaj Taita Dioslla, canga israelcunapaj Taita Diosmi cangui. Tucui llactacunapi causajcunata llaquichingapaj jataripairi. Canda na cazushpa, nalita tucui rurajcunataca, pitapash ama llaquipaichu. Selah

⁶Chishi tigrashpaca, alcushna huacashpami pueblota muyunajunga.

⁷Ricuichi, paicunapaj shimihuan jariyashpami rimanajun. Paicunapaj shimipica, espadashnami tian. Shinamandami: “¿Pita uyangayari?” ninajun.

⁸Ashtahuangarin can Mandaj Diosca, paicunataca asinguimi. Llactacunapi tucui causajcunataca, asishpami ricungui.

⁹Ñucata fiñajcuna ninan ushaita charishcamandami, candalla shuyajusha. Taita Diosca, ñucata mitsashpa ayudaj cajpimi, chashna shuyajushca.

¹⁰Ñucata llaquij Taita Diosmi, ñucata ñaupashpa ringa. Taita Diosmi, ñucata fiñajcunataca, ñuca munashcata rurashpa ricuchihuanga.

¹¹Ñuca llacta gentecuna ama cungachunga, ama huañuchipaichu. Paicunataca, cambaj ushaihuan caita chaita cachashpa, ñavita urai cumuchipailla. Mandaj Dioslla, canga jarcarina ñucanchi escudoshnami cangui.

¹²Paicunapaj shimihuan juchata rurashcamanda, paicunapaj shimihuan llaquichishcamandaca, paicuna jariyashpa rimashcapillata prezu japi tucunajuchun. Llaqui japishpaca alichari canman nishcamanda, llullashpa rimashcamanda, chashna tucuchun.

¹³Ñapash fiñarishpa tucuchipairi, ama ashtahuan tiachun tucuchipairi. Jacobopaj mirai llactapica, tucui cai pacha manñacunacaman Taita Diostaca mandajujta yachachun, chashna rurapairi. Selah

¹⁴Chishi tigrashpaca, alcushna huacashpa pueblota muyunajuchun.

¹⁵Paicunaca, micunata mascashpalla, maitapash purinajuchun. Vijsa pactajta na micushpaca, tucui tuta aij nishpa pacarinajuchun.

¹⁶Ashtahuangarin ñucaca, cambaj tucui ushaitami candasha. Tutamandaca, can llaquij cashcamandami alicachisha. Ninan llaquita apajui punllapi ñucata ayudaj, ñucata pacaj cashcamandami, chashna alicachisha.

¹⁷Ñuca shinlli torreshna Dioslla, candami candasha. Taita Dioslla, ñucata pacaj, ñucata llaquij Taita Dios cashcamandami candasha.