Read Imbabura Highland Quichua Psalms 60 Bible Online

Psalms 60 - Imbabura Highland Quichua bible

Psalms 60

¹Lirio sisacuna nishpa candana tonopi, candajcunata mandaj candachijuchun, yachachingapaj David rurashca juyailla candanami. Cai candanataca, Aram-Naharaim shuti mandajhuambash, Soba shuti llactata mandaj Aram shuti runahuambash macanajushca jipa, Joab tigrashpa Cachi tiaj pugru Pambapi, Edom llactamanda ishcai chunga huaranga runacunata huañuchishca jipami rurashca. Taita Dioslla, canmi ñucanchitaca jichushcangui. Canmi llaquichishcangui. Canga fiñarishcanguimari, ¡ñucanchipajman tigraripairi!

²Alpataca chaupirijtami chujchuchircangui. Chaupirishcacunaca, ashtahuanmi talirinajun, alichipairi.

³Can agllashcacunamanmi, shinlli llaquicunata ricuchircangui. Muspachij vinotami, ñucanchiman ufiachircangui.

⁴Canda manllajcunamanmi, banderata cushcangui. Can na llullaj cajta yarishpa alsachunmi cushcangui. Selah

⁵Can juyashcacuna cacharichi tucuchunga, cambaj ali lado maquihuan quishpichipairi. Ñuca mañajujtaca uyahuayari.

⁶Taita Diosca, paipajlla huasipica cashnami nijurca: “Ñucaca ninandami cushijusha. Siquem shuti pueblotaca chaupishami. Sucot shuti pugru pambatapash medishami.

⁷Galaad llactaca ñucapajmi, Manasés llactapash ñucapajmi. Efraín llactaca, ñuca umapi churajuna jirrumi. Judá llactaca, ñuca churashca mandajmi.

⁸Moab llactaca, yacuta japishpa ñuca maillarinami. Ñuca chaquipi churajunataca, Edom llactapimi shitasha. Filistea llactata mishashpaca cushijushami” nijurcami.

⁹Muyundi jatun pircahuan pueblomambash, ¿pita pushahuangayari? Edom llactacamambash, ¿pita pushahuangayari?

¹⁰Taita Dioslla, ¿nachu ñucanchita jichushpa saquij Diosllata pushana cangui? Taita Dioslla, ¿nachu ñucanchi soldadocunahuan llujshin carcangui?

¹¹Ñucanchita fiñajcunata mishangapaj ayudahuayari. Runacunalla ayudashcapash, yanga yangami.

¹²Taita Dioshuanga, jatun manllarinacunata rurashunllami. Paimi, ñucanchita fiñajcunataca sarunga.