Read Imbabura Highland Quichua Psalms 62 Bible Online

Psalms 62 - Imbabura Highland Quichua bible

Psalms 62

¹Candajcunata mandaj Jedutún candachijuchun, David rurashca Salmomi. Ñuca almaca, Taita Diospillami saman. Paimandami, ñuca quishpirinaca shamun.

²Paillami, ñuca jatun Rumishnapash, ñucata quishpichijpash. Paica ñuca pacajunami. Na yapa lluchashpa urmashachu.

³Cangunaca, ¿ima horascamanda shuj runataca, urmanalla shuj pirca llapigrijunshna, shuj muyundi jarcashca pata llapigrijunshna, llaquichinatalla yariashpa causagringuichi?

⁴Alipi tiajujmandapash anchuchinata yariashpami causanajun. Llullanatallami juyanajun. Shimihuanga alicachinajunmi. Ashtahuangarin shungupica, ima llaquipash japishpaca alichari canman yashpami purinajun. Selah

⁵Ñuca almaca, Taita Diospillami saman. Paitallami shuyashpa causani.

⁶Paillami, ñuca jatun Rumishnapash, ñucata quishpichijpash. Paica, ñuca pacajunami, na lluchashpa urmashachu.

⁷Taita Diospimi, ñuca quishpirinapash, ñuca alicachi tucunapash. Taita Diosmi, ñuca jatun shinlli Rumishnapash, ñuca pacajunapash.

⁸Gentecuna, tucui huatacuna paitalla shuyaichiyari. Paipaj ñaupajpica, tucui shungu mañaichiyari. Taita Diosmi, ñucanchi pacajuna. Selah

⁹Huañuna aichayu runacunapaj miraicunaca yangallapachami, runacunapaj miraicunaca llullami. Balanzapi tucuillata tandachishpa pezajpica, imapash na canmanllu.

¹⁰Shujcunata ninandapacha llaquichinatapash, macashpa shuhuanatapash na yariashpa causanachu canguichi. Chashna rurashpara, yanga tucunguichiman. Canguna charishcacuna ashtahuan mirajpipash, na chaitalla yarianachu canguichi.

¹¹Shuj viajemi, Taita Diosca cashna rimarca. Chashna rimajtaca, ishcaicamanmi uyarcani: “Ninan ushaica, Taita Diospajmi.

¹²Jatun Diospaj llaquinaca, cambajmi. Canmi, tucuicuna imatalla rurashcamandaca, paicuna japina cashcatapachata cungui” nijtami uyarcani.